Хуульчийн эрх зүйн байдлын тухай хуулийн шинэчилсэн найруулгын төслийг Монгол Улсын Хууль зүйн яамнаас боловсруулж, Засгийн газрын хуралдаанаар хэлэлцүүлэхээр болсонтой холбогдуулж, тус хуулийн төсөл болон Улсын Их Хуралд өргөн мэдүүлсэн Өмгөөллийн тухай хуулийн төслийн хэлэлцүүлгийг 2015 оны 10 дугаар сарын 08-ны өдрийн 17:00 цагаас Хуульчдын танхимд зохион байгууллаа.
Тус хэлэлцүүлэгт нийт 70 гаруй хуульч, иргэд оролцсон бөгөөд Хуульчийн эрх зүйн байдлын тухай хуулийн шинэчилсэн найруулга болон Өмгөөллийн тухай хуулийг батлан гаргах хэрэгцээ, шаардлагатай эсэх, одоо хүчин төгөлдөр мөрдөгдөж буй Хуульчийн эрх зүйн байдлын тухай хуулийн хэрэгжүүлэхэд учирч буй хүндрэл, бэрхшээл, түүнийг даван туулах арга замын талаар хэлэлцүүлгийг өрнүүллээ.
Хэлэлцүүлгийн үеэр Өмгөөллийн тухай хуулийг батлан гаргах хэрэгцээ, шаардлага, тус хуулийн үзэл, баримтлалын талаарх мэдээллийг Хуульчдын холбооны анхны Ерөнхийлөгч, өмгөөлөгч Д.Батсүх хэлэлцүүлэгт оролцсон хуульчдад танилцуулсан бол хууль зүйн ухааны доктор О.Мөнхсайхан нь Хуульчийн эрх зүйн байдлын тухай хуулийн шинэчилсэн найруулга батлагдсанаар үүсэх сөрөг үр дагаврын талаарх судалгааг танилцуулсан юм.
Хэлэлцүүлгийн явцад Өмгөөллийн тухай хууль болон Хуульчийн эрх зүйн байдлын тухай хуулийн шинэчилсэн найруулгыг батлан гаргахад нийт хуульчдаар хэлэлцүүлэх, хуульчдаас санал авах, Хуульчийн эрх зүйн байдлын тухай хуулийн хэрэгжилтэд үнэлгээ, мониторинг хийх шаардлагатай талаар хуульчид санал гаргасан байна.
Хэлэлцүүлгийн видео бичлэг үзэх:
