Хуульчийн эрх зүйн байдлын тухай хуулийн 49 дүгээр зүйлийн 49.4-т “Эрх зүйн салбар, мэргэшил болон тусгай асуудлаар холбооны гишүүд сайн дураараа нэгдэж хороо байгуулж болно”, 49.7-д “Энэ хуулийн 49.4-т заасан хорооны даргыг тухайн хорооны гишүүд дотроосоо сонгох бөгөөд хорооны даргын бүрэн эрхийн хугацаа хоёр жил байна” гэж тус тус заасан байдаг.

        Энэ хүрээнд Хуульчдын анхдугаар их хурлын 2013 оны 10 дугаар сарын 06-ны өдрийн 10 дугаар тогтоолоор эрх зүйн салбар, мэргэшил болон тусгай асуудлаар хуульчдын сайн дураараа нэгдэж байгуулсан 11 хороог батламжилсан. Тодруулбал, Шүүгчдийн хороо, Прокурорын хороо, Өмгөөлөгчдийн хороо, Үндсэн хуулийн эрх зүйн хороо, Олон улсын эрх зүйн хороо, Эрүүгийн эрх зүйн хороо, Иргэний эрх зүйн хороо, Захиргааны эрх зүйн хороо, Эдийн засгийн эрх зүйн хороо, Хуульчийн нийтэд тустай мэргэжлийн үйл ажиллагаа эрхлэх хороо, Төлбөрийн чадваргүй иргэдэд хууль зүйн туслалцаа, өмгөөллийн үйлчилгээ үзүүлэх асуудал эрхэлсэн хороо батламжлагдсан билээ.

        Хуульчдын анхдугаар их хурлаас батламжлагдан үйл ажиллагаа явуулж буй эдгээр хороодын тэргүүний бүрэн эрхийн хугацаа 2015 оны аравдугаар сарын 06-ны өдрөөр дуусгавар болж байгаа юм. Иймд дээрх хороодын тэргүүнийг сонгох сонгуулийг тухайн хорооны нийт гишүүдийн дунд 2015 оны 10 дугаар сарын 22-оос 2015 оны 10 дугаар сарын 29-ний өдрийн хооронд www.mglbar.mn цахим хуудасны “Сонгуулийн цахим систем”-ийг ашиглан зохион байгуулахаар боллоо.

        Ингэхдээ хорооны тэргүүнд нэр дэвшүүлэх ажиллагааг 2015.10.22-ны өдрийн 10:00 цагаас эхлүүлж, 2015.10.27-ны өдрийн 17:00 цаг хүртэлх хугацаанд, нэр дэвшигчид санал ажиллагааг 2015.10.27-ны өдрийн 18:00 цагаас эхлүүлж, 2015.10.29-ний өдрийн 17:00 цаг хүртэлх хугацаанд тус тус зохион байгуулах юм.

        Эрхэм хуульч та бүхнийг өөрийн харьяалагдаж буй хорооныхоо тэргүүнийг сонгох сонгуульд идэвхтэй оролцож, өөрийнхөө нэрээ дэвшүүлэхийг уриалж байна.

ТАМГЫН ГАЗАР