Мэдээллийн www.news.mn сайтад 2015.10.21-ний өдөр “ШҮҮГЧДИЙН ЦАЛИНГ БУУРУУЛАХ НЬ ЗӨВ ҮҮ” гарчигтай “Засгийн газраас Монгол Улсын 2016 оны төсвийн тухай хуулийн төслийг боловсруулан УИХ-д өргөн барьсан билээ. Тэрхүү хуулийн төсөлд төрийн өндөр дээд албан тушаалтан буюу төрийн захиргааны албан тушаалтнуудын цалинг 30 хувиар бууруулах асуудал тусгагдсан байгаа бөгөөд тэдний тоонд шүүгчид ч бас хамаарч буй. Харин үүнийг эсэргүүцэж Хуульчдын холбоо Үндсэн хуулийн цэцэд хандаад байгаа. Энэ асуудлыг УИХ-ын Хууль зүйн байнгын хороогоор хэлэлцэх үеэр УИХ-ын гишүүдээс тус байнгын хорооны дарга Д.Ганбат болон гишүүн З.Баянсэлэнгэ нар эсэргүүцэж байсан юм” гэсэн агуулга бүхий мэдээг нийтэлсэн байна.

Хуулийн зохицуулалтын хувьд Монголын Хуульчдын  холбоо нь Үндсэн хуулийн цэцэд хандах эрхгүй бөгөөд Үндсэн хуулийн цэцэд маргаан хянан шийдвэрлэх ажиллагааны тухай хуулийн 16 дугаар зүйлийн 16.1-д “Үндсэн хууль зөрчсөн эсэх асуудлаар өргөдөл, мэдээллийг иргэд,  хүсэлтийг Ерөнхийлөгч, Улсын Их Хурал, Ерөнхий сайд, Улсын дээд шүүх, Улсын ерөнхий прокурор гаргах эрхтэй” гэж заасан байдаг.

Иймд хуулийн дээрх зохицуулалтын талаар www.news.mn сайтын удирдлагад хандан тайлбарлаж, ташаа мэдээнд залруулга хийсэн болно.

МОНГОЛЫН ХУУЛЬЧДЫН ХОЛБООНЫ  ТАМГЫН ГАЗАР