Монголын Хуульчдын холбооны гадаад харилцаа, хамтын ажиллагааны хэлтсийн дарга Ц.Арилдийпүрэв, мэргэжилтэн Н.Хишигсүрэн нар АНУ-ын тэргүүлэх зэрэглэлийн Пенсилванийн Их Сургуулийн Хуулийн Сургуулийн Дэд захирал Стивен Г. Барнестай уулзаж, Монголын хуульчдын олон улсын хэмжээнд өрсөлдөх чадварыг нэмэгдүүлэх, хэлний мэдлэгийг дээшлүүлэх, туршлага судлах, ур чадварыг нэмэгдүүлэх зорилгоор хоёр талын урт хугацааны, үр өгөөжтэй, тогтвортой хамтын ажиллагааг эхлүүлэх боломжуудын талаар ярилцаж хамтран ажиллахаар тохиролцлоо.

    Дэд захирал Стивен Г. Барнес Пенсилванийн их сургуулийн Хуулийн сургууль нь Монголын Хуульчдын холбооны гишүүн хуульчдыг тэтгэлэгтэйгээр суралцуулах, мэргэшсэн сертификатын сургалтыг арбитр, зуучлал, хэлэлцээр, бизнесийн эрх зүй, өрсөлдөөний эрх зүй, эрчим хүчний эрх зүй гэх мэт сэдвүүдээр урт богино хугацаатай сургалтуудад хамруулах, хуульч эрдэмтэдийг солилцох хөтөлбөрийг хэрэгжүүлэх зэрэг хамтын ажиллагааны хэлбэрүүдийг эхлүүлэхэд бэлэн байгаагаа илэрхийллээ.

    Мөн түүнчлэн Монголын Хуульчдын холбооны гишүүн хуульчдад АНУ-д мэргэжил дээшлүүлэх, хууль зүйн мэргэжлийн байгууллагуудад дадлага хийх нөхцөлийг бүрдүүлэхээр боллоо.

    Энэхүү хамтын ажиллагаа нь монголын хуульчдын ур чадварыг нэмэгдүүлэх, Монгол Улсын хууль эрх зүйн тогтолцоог сайжруулахад үнэтэй хувь нэмэр оруулна гэдэгт итгэлтэй байгаагаа хоёр тал харилцан илэрхийллээ.