Монголын Хуульчдын холбооны Ерөнхийлөгчийн 2015 оны 10 дугаар сарын 27-ны өдрийн 28 дугаар тушаалын дагуу тус холбооны гишүүнээр элсэж буй 125 шинэ хуульчийн тангараг өргөх ёслолын ажиллагааг 2015 оны аравдугаар сарын 30, арван нэгдүгээр сарын 02-ны өдрүүдэд Хуульчдын танхимд зохион байгууллаа.

Тангараг өргөх ёслолын ажиллагаанд тус холбооны Зөвлөлийн гишүүн Т.Жавхлантөгс, Шүүхийн ерөнхий зөвлөлийн гүйцэтгэх нарийн бичгийн дарга Т.Мэндсайхан, Монголын Өмгөөлөгчдийн холбооны Ерөнхийлөгч Б.Ганбаатар нар уригдан оролцсон бөгөөд тангараг өргөх ёслолын үеэр шинэ хуульчдад мэргэжлийн үйл ажиллагаа эрхлэх зөвшөөрлийн гэрчилгээг нь олгосон юм.

Хуульчийн эрх зүйн байдлын тухай хуулийн 19 дүгээр зүйлийн 19.1-д заасны дагуу хуульчийн мэргэжлийн шалгалтад тэнцэж батламж авсан иргэн нь батламжаа авсанаас хойш 90 хоногийн дотор Хуульчдын холбоонд гишүүнээр элсэх өргөдлөө гаргах ёстой.

Үүний дагуу Хуульчдын холбооны гишүүнээр элсэх өргөдлийг тус холбооны Тамгын газар 2015 оны 10 дугаар сарын 05-ны өдрөөс авч эхэлсэн бөгөөд эхний ээлжинд өргөдлөө гаргаад байсан 125 хуульчийг гишүүнээр элсүүлж, хуульчийн мэргэжлийн үйл ажиллагаа эрхлэх зөвшөөрөл олгоод байгаа нь энэ юм.