Монголын Хуульчдын холбооны 2024 оны хуульчийн мэргэжлийн шалгалтад 1200 гаруй эрх зүйч бүртгүүлж оролцсоноос 205 эрх зүйч шалгалтад тэнцсэн. Үүнээс холбооны Ерөнхийлөгчийн 2024 оны арванхоёрдугаар сарын 06-ны өдрийн 276 дугаар тушаалаар гишүүнээр элсүүлсэн 99 хуульчийн тангараг өргөх ёслолын ажиллагааг өчигдөр зохион байгууллаа.

   Тангараг өргөх ёслолын ажиллагааг Монголын Хуульчдын холбооны Тамгын газрын дарга Ш.Жолбарс удирдан чиглүүлсэн бөгөөд Монголын Хуульчдын холбооны Ерөнхийлөгч П.Одгэрэл, Шүүгчдийн хорооны тэргүүн, Иргэний хэргийн давж заалдах шатны шүүхийн шүүгч С.Энхбаяр, Хуульчдын холбооны сургагч багш, Цагдаагийн Ерөнхий газрын дэд дарга, хурандаа Н.Мөнхзул, Хуульчийн үргэлжилсэн сургалтын асуудал эрхэлсэн хорооны гишүүн, өмгөөлөгч Ө.Эрдэнэ-Очир нар оролцож, шинэ хуульчдад мэргэжлийн үйл ажиллагаа эрхлэх зөвшөөрлийн гэрчилгээ гардуулж, баяр хүргэн, цаашдын ажилд нь амжилт хүслээ.