АНУ-ын ЭСЯ-тай хамтран хэрэгжүүлсэн “Фулбрайт” хөтөлбөрийн хүрээнд “Кибер аюулгүй байдал”-ын сургалтыг 2025 оны наймдугаар сарын 04-15-ны өдрүүдэд зохион байгууллаа.
Эхний 7 хоногийн сургалтад анхан болон давж заалдах шатны шүүхийн, мөн ШЕЗ, Сахилгын хорооны мэдээллийн технологийн зарим мэргэжилтнүүд оролцож, батламж гардан авсан.
Тус сургалтыг доктор, профессор Дивайн Суфор Анье удирдан явуулсан бөгөөд тэрбээр "Аюулгүй байдлын тусгай ажиллагааны төвүүдийг (SOCs) байгуулж, цахим аюулгүй байдлын заналхийллийг цаг тухайд нь хянах, илрүүлэх, хариу арга хэмжээ авах, мөн технолгийн шинэчлэл, хөрөнгө оруулалтыг хийх, сургалтын боломжуудыг өргөжүүлэх, мэдээллийн технологийн ажилтнуудаас гадна шүүгч, шүүхийн захиргааны ажилтнуудыг сургах нь чухал" гэдгийг онцолсон.
Дараагийн 7 хоногийн сургалтад Кибер халдлага, зөрчилтэй тэмцэх Үндэсний болон Нийтийн төв, Кибер аюулгүй байдлын Цэргийн командлал, ЦЕГ-ын харьяа Кибер гэмт хэрэгтэй тэмцэх газар, MN Cert зэрэг байгууллагын төлөөлөл оролцсон. Сургалтын үеэр Цахим хөгжил, инновац, харилцаа холбооны сайд Э.Батшугар доктор, профессор Дивайн Суфор Аньег хүлээн авч уулзаж, цахим шилжилтийн эрчимтэй энэ үед кибер аюулгүй байдлын чиглэлээр сургалт явуулсанд талархал илэрхийлээд кибер аюулгүй байдлын хүний нөөцийг чадавхжуулах, зайнаас тандан судлах чиглэлд хамтарсан сургалт зохион байгуулах зэрэг олон чиглэлээр АНУ-тай хамтран ажиллах төлөвлөгөөтэй байгаагаа дурдлаа.
