Монголын Хуульчдын холбооны Ерөнхийлөгч П.Одгэрэл, Олон Улсын эрх зүйн хорооны тэргүүн Х.Наранбулаг нар АНУ-ын Худалдааны яамны дэргэдэх Арилжааны эрх зүйн хөтөлбөрийн Олон улсын зөвлөх хуульч Гришма Прадханыг хүлээн авч уулзлаа.

   Энэ удаагийн уулзалтаар цаашид хэрэгжүүлэх ажлын талаар санал солилцож,  төр хувийн хэвшлийн түншлэл болон хиймэл оюун ухаан, эрчим хүч, дэд бүтцийн чиглэлээр сургалтын хөтөлбөр боловсруулж хамтран ажиллахаар тохиролцлоо.

    АНУ-ын худалдааны яамны дэргэдэх Арилжааны эрх зүйн хөтөлбөр нь хөгжиж буй улс орнуудын гадаадын хөрөнгө оруулалт ба бизнесийн эрх зүйн орчныг боловсронгуй болгох чиглэлээр үйл ажиллагаа явуулдаг бөгөөд тус хөтөлбөр хэрэгжиж буй орны хуульч, судлаач, төрийн албан хаагчдад зориулан арилжааны эрх зүйн чиглэлээр сургалт явуулах, бусад оронд хэрэгжсэн сайн жишгийг танилцуулах, нэвтрүүлэх зэрэг хууль зүйн техник туслалцаа үзүүлдэг байгууллага юм.

   Тус байгууллага нь Монголын Хуульчдын холбооны хүсэлтээр АНУ, Сингапур, Токио, Парис зэрэг улс, хотууд дахь  DLA Piper, Clifford Chance, Shearman Sterling, Rajah & Tann гэх мэт нэр хүндтэй олон улсын хуулийн фирмүүдийн туршлагатай хуульчдыг урьж  "Олон Улсын Арилжааны арбитр", "Хөрөнгө оруулагч-Засгийн газар хоорондын маргааныг шийдвэрлэх нь", "Төр, хувийн хэвшлийн түншлэл", "Бизнесийн хэлэлцээр хийх арга зүй" гэх мэт сэдвийн хүрээнд цуврал сургалтуудыг Монголын Хуульчдын холбооны гишүүн хуульчдад зохион байгуулж, 250 гаруй хуульч хамрагдан сертификат гардан авсан байдаг.