Монголын Хуульчдын холбооноос 2025 оны хуульчийн мэргэжлийн шалгалтад тэнцсэн шинэ хуульчдад хуульчийн үргэлжилсэн сургалтын хоёр багц цагийн сургалтыг өнөөдөр зохион байгууллаа.

Хуульчийн үргэлжилсэн сургалт зохион байгуулах, багц цаг тооцох журамд зааснаар шинэ хуульчийн сургалтын агуулгад Хуульчийн эрх зүйн байдлын тухай хууль болон хуульчийн мэргэжлийн үйл ажиллагааг хэрэгжүүлэхэд мөрдөгдөх дүрэм, журам, Хуульчдын холбооны бүтэц, зохион байгуулалт, хүний эрх, хуульчийн ёс зүйн чиглэлийн сургалтыг оруулахаар зохицуулсан байдаг.

Тус сургалтад Монголын Хуульчдын холбооны Тамгын газрын дарга Ш.Жолбарс “Монголын Хуульчдын холбооны бүтэц, зохион байгуулалт, дүрэм журмын хэрэгжилт” сэдвээр, сургагч багш Г.Оюунболд “Технологи ашиглан үйлдэгдэж буй жендерт суурилсан хүчирхийлэл” сэдвээр, сургагч багш Н.Мөнхзул “Хуульчийн мэргэжлийн ёс зүй” сэдвээр, сургагч багш Д.Энх-Амгалан “Хүний халдашгүй, чөлөөтэй байх эрх” сэдвээр тус тус хичээл заасан.

Мөн Хуульчийн нийтэд тустай мэргэжлийн үйл ажиллагаа эрхэлсэн хорооны Удирдах зөвлөлийн гишүүн Ц.Одонжав хуульчийн нийтэд тустай мэргэжлийн үйл ажиллагааны тухай, түүнд хэрхэн оролцох боломжийн талаар, Монголын Хуульчдын холбооны Тамгын газрын ахлах мэргэжилтэн Х.Наранхүү Хуульчдын холбооны сайтад нэвтрэх, ашиглах зааврын талаар мэдээлэл өглөө.