Монголын Хуульчдын холбооны Хуульчийн нийтэд тустай мэргэжлийн үйл ажиллагаа эрхэлсэн хорооны санаачилгаар Хансс-Зайделийн сан, МУИС-ийн Герман, Европын эрх зүйн төвтэй хамтран Хуулийн төсөл боловсруулагчийн гэрчилгээ олгох сургалтыг 2026 оны 05 дугаар сарын 07,08-ны өдрүүдэд зохион байгууллаа.

Сургалтыг Монголын Хуульчдын холбооны Ерөнхийлөгч М.Мөнхбат, Ханнс-Зайделийн сангийн Ардчиллын тогтолцоог дэмжих төсөл хариуцсан менежер С.Бүжинлхам нар нээж үг хэлсэн бөгөөд Монголын Хуульчдын холбооны Ерөнхийлөгч М.Мөнхбат "Хуулийн төсөл боловсруулагчдын сургалтын эрэлт хэрэгцээ жил ирэх тусам нэмэгдэж байгаа нь тухайн сургалтын чанар чансаа, цар хүрээ, үр дүнг илтгэнэ. Аливаад шинжлэх ухаанч, логиктойгоор, сэтгэл зүрхнээсээ хэр нь мэргэжлийн хандаж, ёс зүйн өндөр түвшинд, мэдрэмжтэй ажиллах арга зүйд суралцах боломж" хэмээн сургалтын ач холбогдлыг онцолсон.

Тус сургалтыг зургаан үндсэн сэдэв, 24 дэд сэдвийн хүрээнд явуулж, Монголын Хуульчдын холбооны Ерөнхийлөгч М.Мөнхбат, Герман, Европын эрх зүйн төвийн захирал, Хууль зүйн ухааны доктор (Ph. D), дэд профессор Т.Золбоо, Герман, Европын эрх зүйн төвийн ахлах судлаач, Хууль зүйн ухааны доктор Д.Баяр, Герман, Европын эрх зүйн төвийн ахлах судлаач, Хууль зүйн ухааны доктор Б.Баасандорж, Герман, Европын эрх зүйн төвийн ахлах судлаач, Хууль зүйн ухааны доктор (Ph. D), дэд профессор Б.Батбаяр, Монголын Хуульчдын холбооны сургагч багш Г.Оюунболд нар хичээл зааж, сургалтад оролцогчдын сонирхсон асуултад хариулж, чөлөөт хэлэлцүүлэг өрнүүлсэн.

Сургалтад 56 хуульч хамрагдаж, гэрчилгээ гардан авсан бөгөөд гэрчилгээ гардуулах ёслолын үеэр Монголын Хуульчдын холбооны Тамгын газрын дарга Ш.Жолбарс “Цаашид илүү олон хуульчдыг мэргэшүүлж, гарын авлага болон зааварчилгааны материалыг боловсруулан баяжуулж, оролцогчдод илүү системтэй, практик зөвлөмж, дасгалуудыг хүргэхээр ажиллана” гэдгийг дуулгасан.