Ханнс-Зайделийн сангийн Солонгосын хойг болон Монголыг хариуцсан суурин төлөөлөгч Феликс Гленк Монголын Хуульчдын холбооны Ерөнхийлөгч М.Мөнхбатыг 2026 оны нэгдүгээр сарын 29-ний өдөр хүлээн авч уулзлаа.
Уулзалтын үеэр Монголын Хуульчдын холбооны Ерөнхийлөгч М.Мөнхбат өнгөрсөн хугацаанд Хуульчийн мэргэжлийн шалгалтыг боловсронгуй болгох, иргэдийн эрх зүйн боловсролыг дээшлүүлэх, хуульчийн үргэлжилсэн сургалтад видео сургалтын хөтөлбөр нэвтрүүлэх чиглэлээр хамтран ажиллаж, дэмжлэг үзүүлж ирсэнд Ханнс-Зайделийн сангийн хамт олонд талархал илэрхийлээд, 2026 онд хамтран хэрэгжүүлэх ажлын төлөвлөгөөний талаар санал солилцсон юм.
Цаашид Монголын Хуульчдын холбооны Судалгааны төвийн үйл ажиллагааг бэхжүүлэх, хуульчид цахим технологийг хэрхэн ашиглах, хуулийн төсөлд нөлөөллийн үнэлгээ хийх тогтолцоог сайжруулах сургалт зохион байгуулах зэрэг чиглэлээр нарийвчилсан төлөвлөгөө гаргаж хамтран ажиллахаар боллоо.
Тус уулзалтад Монголын Хуульчдын холбооны Тамгын газрын дарга Ш.Жолбарс, Хансс-Зайделийн сангийн менежер, гүйцэтгэх захирал С.Мөнхжаргал, Эрх зүйн төсөл хариуцсан менежер С.Амармэнд нар оролцсон.
