Улсын Их Хурлын Тамгын газар, Монголын Хуульчдын холбоо, Швейцарын хөгжлийн агентлагийн “Парламентын институцийг бэхжүүлэх нь” төсөл, Ханнс Зайделийн сан, Монгол Улсын Их сургуулийн Герман, Европын эрх зүйн төв хамтран зохион байгуулсан Хуулийн төсөл боловсруулагчийн сургалт дөрвөн өдөр үргэлжилж, 2026 оны хоёрдугаар сарын 13-ны өдөр өндөрлөлөө.

Сургалтад оролцогчдод гэрчилгээ гардуулах ёслолын үеэр Монголын Хуульчдын холбооны Ерөнхийлөгч М.Мөнхбат "Төр, иргэний нийгмийн байгууллагын хамтын ажиллагаа бэхжиж байгаа нь хууль эрх зүйн салбарын хөгжилд нэмэртэй төдийгүй асуудлыг олон талаас харж, шийдвэрлэхэд үр дүнтэй" хэмээн тэмдэглээд Улсын Их Хурлын Тамгын газар, Хуульчдын холбоотой хамтран ажиллах санамж бичгийн хүрээнд сургалтын хөтөлбөрийг магадлан итгэмжлүүлж, кредит цаг тооцох, мэргэжилтэн бэлтгэх чиглэлээр ажилласаар ирсэн нь чухал ач холбогдолтойг онцолсон юм.

Сургалтад оролцогчдын зүгээс мэдлэг чадвартай багш нар бодит амьдрал, туршлагадаа тулгуурласан үнэтэй мэдээлэл өгч, дадлага хийлгэн хичээлээ заасан нь сэтгэлд тод үлдэж, цаашдын ажилд томоохон туршлага, сургамж өглөө хэмээн дүгнэлээ.

Энэхүү сургалтад Улсын Их Хурлын Тамгын газар, Ерөнхийлөгчийн Тамгын газар, Засгийн газрын Хэрэг эрхлэх газар, төрийн захиргааны төв байгууллага, Улсын Их Хурлаас бүрэлдэхүүн, удирдлагыг томилдог зарим байгууллагын хууль, эрх зүйн асуудал хариуцсан нэгжийн хуулийн төсөл боловсруулах чиг үүрэг бүхий 50 гаруй албан хаагч хамрагдаж гэрчилгээ гардан авсан бол сургалтад хичээл заасан багш нарт батламж олголоо.