Монголын Хуульчдын холбооны Ерөнхийлөгч М.Мөнхбат, Тамгын газрын дарга Ш.Жолбарс нар өчигдөр /2926.03.19/ Жендэрийн Үндэсний хорооны Нарийн бичгийн дарга бөгөөд Ажлын албаны дарга А.Адилбишийг хүлээн авч уулзлаа.

Жендэрийн Үндэсний хороо нь 2024 онд Монголын Хуульчдын холбоотой хамтран ажиллах санамж байгуулсан бөгөөд энэхүү хамтын ажиллагааг эрчимжүүлж, 2026 онд тодорхой чиглэлүүдэд үр дүн гаргаж ажиллахаар ярилцав.

Түүнчлэн хүний эрхийг хамгаалах, жендэрийн эрх тэгш байдлыг хангах, хүчирхийллээс ангид эрх зүйн орчныг бэхжүүлэх талаар ЖСХ-ийн асуудлыг хууль зүйн сургалтын зайлшгүй судлах хичээл болгон оруулж, магадлан итгэмжлэлийн шалгуурт тусгахад, жендэрт суурилсан хүчирхийллийн хохирогчийг дэмжих сан байгуулж, нөхөн олговрын тогтолцоог хөгжүүлэхэд идэвхтэй хамтран ажиллах, ЖСХ-ийн нэгдсэн дата мониторингийн системийг бий болгох шаардлагатай байгаа талаар оролцогч талууд санал солилцлоо.

Талууд 2026 онд хэрэгжүүлэх тэргүүлэх чиглэлийг тодорхойлох, цаашлаад хуульчдыг чадавхжуулах менторшип хөтөлбөрийг жендэрийн агуулгатай өргөжүүлэн хөгжүүлж шинэ хуульчдыг практикт жендэрийн эрх тэгш байдлыг хангах талаар Монголын Хуульчдын холбооны салбарууд болон 21 аймагт жендэрийн үндэсний сургагч багшийн үе шаттайгаар бэлтгэх зэрэг асуудлаар хамтран ажиллахаар боллоо.

Тус уулзалтад ЖҮХ-ны гишүүн Хүчирхийллийн эсрэг үндэсний төвийн захирал Н.Арвинтариа, Хорооны дэргэдэх жендэрийн шинжээчдийн бүлгийн шинжээч, Хүйсийн тэгш эрхийн төвийн тэргүүн Г.Ганбаясгах, Ажлын албаны ахлах мэргэжилтэн Х.Цэнджав, Нийгмийн түншлэл, хамтын ажиллагаа хариуцсан мэргэжилтэн Г.Батхишиг нар болон Монголын Хуульчдын холбооны Тамгын газрын холбогдох мэргэжилтнүүд оролцсон.