Монголын Хуульчдын Холбооны Ерөнхийлөгч М.Мөнхбат АНУ-ын Техас мужийн Барын холбооны Ерөнхийлөгч Сара Китлийг 2026 оны 05 дугаар сарын 23-ны өдөр хүлээн авч уулзлаа.
Уулзалтын үеэр хоёр байгууллагын бүтэц, чиг үүрэг, үргэлжилсэн сургалт болон мэргэжлийн хороодын үйл ажиллагааг танилцуулсан бөгөөд Техас мужийн Барын холбооны Ерөнхийлөгч хатагтай Сара Китли хуульчийн үргэлжилсэн сургалт, мэргэжлийн хөгжлийн чиглэлээр хамтран ажиллах боломжтойг илэрхийлж, Техас мужийн Барын холбооны туршлага, сургалтын хөтөлбөрүүдийг хуваалцахад бэлэн байгааг хэлсэн.
Мөн хамтарсан сургалт, судалгаа зохион байгуулах, үргэлжилсэн сургалтын кредитийг харилцан зөвшөөрөх, гэр бүлийн эрх зүй, арбитр, эвлэрүүлэн зуучлалын чиглэлээр туршлага солилцох, мэргэшсэн хороодын түвшинд хамтын ажиллагаагаа хөгжүүлэх тохиролцсон.
Уулзалтын төгсгөлд хоёр байгууллага ажлын хэсэг байгуулж, хамтын ажиллагааны нарийвчилсан төлөвлөгөө боловсруулан хамтран ажиллахаар болсон юм.
Тус уулзалтад Хуульчдын холбооны Ерөнхийлөгч асан Б.Батсүх, Тамгын газрын дарга Ш.Жолбарс, Эрүүгийн эрх зүйн хорооны Тэргүүн, Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхийн шүүгч П.Ариунболд, Гадаад харилцааны зөвлөх Ц.Одонжав нар оролцлоо.
