Олон Улсын залуу хуульчдын холбоо (AIJA)-ны “AIJA 4th Asia Pacific Regional Meeting 2026” бүсийн уулзалт БНХАУ-ын Шанхай хотноо 2026 оны есдүгээр сарын 18-ны өдөр зохион байгуулагдав.

Энэ удаагийн уулзалт “Navigating the Future: Asia’s Legal Landscape” буюу “Ирээдүйг чиглүүлэх нь: Азийн эрх зүйн орчин” сэдвийн хүрээнд болж байгаа бөгөөд Ази, Номхон далайн бүсийн хуульчид, эрх зүйн салбарын төлөөлөгчид нэг дор цугласан билээ.

Тус уулзалтад Монголын Хуульчдын холбооны гишүүн хуульч, өмгөөлөгч Н.Баясгалан, Хэвлэл мэдээлэл, олон нийттэй харилцах мэргэжилтэн Б.Аззаяа нар оролцож, Азийн бүс нутгийн хуульчидтай туршлага, мэдээлэл солилцлоо. Хуульч Н.Баясгалан нь Монголын Хуульчдын холбоо, Нээлттэй нийгэм форумаас “Залуу хуульчдын манлайллын форум”-хүрээнд зохион байгуулсан эсээ бичлэгийн уралдааны хоёрдугаар байрт шалгарч энэхүү уулзалтад оролцох эрхээр шагнуулсан билээ.

Тус уулзалтын хүрээнд Азийн өртгийн сүлжээний өөрчлөлт, хил дамнасан M&A, комплаенс болон нийлүүлэлтийн сүлжээний тогтвортой байдал, мөн олон улсын зах зээлд өргөжин тэлэх үед өөр өөр соёл, орчинтой үйлчлүүлэгчидтэй харилцах, гэрээ хэлцэл хийх зэрэг цаг үеийн чухал асуудлуудыг хэлэлцсэн.

Энэхүү уулзалт нь Азийн бүс нутгийн эрх зүйн орчны өөрчлөлт, олон улсын бизнесийн харилцаа болон хуульчдын хамтын ажиллагааны талаар харилцан туршлага солилцох, мэргэжлийн шинэ харилцаа холбоо тогтоосон чухал үйл ажиллагаа боллоо.