Монголын Хуульчдын холбооны хүсэлтээр АНУ-ын Худалдааны яамны дэргэдэх Арилжааны эрх зүйн хөгжлийн хөтөлбөр (Commercial Law Development Program)-ийн дэмжлэгтэйгээр 2023 оны 04 дүгээр сарын 17, 18-ны өрүүдэд “Олон улсын Арилжааны арбитр”-ын сертификат олгох сургалтыг амжилттай зохион байгууллаа.
АНУ-ын Худалдааны яамны дэргэдэх Арилжааны эрх зүйн хөгжлийн хөтөлбөр (Commercial Law Development Program) нь хөгжиж буй улс орны бизнесийн эрх зүйн орчныг боловсронгуй болгох чиглэлээр үйл ажиллагаа явуулдаг бөгөөд тус хөтөлбөр хэрэгжиж буй орны хуульч, судлаач, төрийн албан хаагчдад зориулан арилжааны эрх зүйн чиглэлээр сургалт явуулах, бусад оронд хэрэгжсэн сайн жишгийг танилцуулах, нэвтрүүлэхэд дэмжлэг үзүүлэх зэрэг хууль зүйн техник туслалцаа үзүүлдэг.
Сургалтыг нээж Арилжааны эрх зүйн хөгжлийн хөтөлбөрийн зөвлөх Гришма Прадхан, Монголын Хуульчдын холбооны Ерөнхийлөгч П.Одгэрэл нар үг хэллээ. Мөн сургалтын хөтөлбөрийн хүрээнд Монгол Улс дахь арбитрын эрх зүйн орчны талаар Монголын Олон улсын арбитрын арбитрч, МУИС-ийн ХЗС-ийн дэд профессор, доктор Т.Мэндсайхан илтгэл хэлэлцүүллээ.
Сургалтыг Сингапур, Япон Улсад үйл ажиллагаа явуулдаг Shearman & Sterling, DLA Piper олон улсын хуулийн фирмийн хуульчид Эммануэл Жакоми, Тонм Андртотис, Артис Страпенис нар удирдан явуулав. Сургалтад өмгөөлөгч, прокурор, нотариатч, арбитрч, шүүгчдийн төлөөлөл 55 хуульч оролцсон бөгөөд сургалтад хамрагдсан хуульчдад сертификат гардууллаа.
Цаашид Монголын Хуульчдын холбоо АНУ-ын Арилжааны эрх зүйн хөтөлбөртэй хамтран арилжааны арбитрын ахисан шатны сургалтыг хамтран зохион байгуулахаар төлөвлөн ажиллаж байна.
