Монгол - Солонгосын хамтарсан Өмгөөллийн "Эл Би Партнерс" ХХК нь 10 жилийн ойгоо угтан БНСУ-ын “With You” хуулийн фирмийн өмгөөлөгч Ну Дун Хёг, Лим Тэг Сог, Жин Син Ил болон БНСУ-ын Захиргааны байгууллага болох Гадаадын иргэн харьяатын газрын захиргааны хуульч Ким Вол Сү нар хамтран доорх хоёр арга хэмжээг БНСУ-д зохион байгууллаа. Үүнд:

1. БНСУ-д амьдарч байгаа нийт Монгол иргэддээ хууль зүйн үнэ төлбөргүй зөвлөгөө өгөх “Зөвлөх үйлчилгээний өдөрлөг”-ийг 2023 оны 4 дүгээр сарын 16-ны өдөр.
2. БНСУ-аас МУ-д бизнес эрхлэх сонирхолтой бизнес эрхлэгчдэд зориулсан хөрөнгө оруулалтын талаарх мэдээлэл, зөвлөгөө өгөх өдөрлөгийг 2023 оны 4 дүгээр сарын 17-ны өдрүүдэд зохион байгуулсан.

Бидний энэхүү “Зөвлөх үйлчилгээний өдөрлөг”-т:

• “Инвескор Лизинг” ХХК-ийн БНСУ дахь Төлөөлөгчийн газар лизингийн цогц үйлчилгээ үзүүлж;
• “UA Рroperties” ХХК үл хөдлөх хөрөнгө зуучлал чиглэлээр зөвлөх үйлчилгээ үзүүлж;
• МУ-ын засгийн газрын БНСУ дахь Хөдөлмөр, нийгмийн хамгааллын үйлчилгээний төвийн ажилчид БНСУ-д гэрээний үндсэн дээр хөдөлмөр эрхэлж буй иргэдэд зөвлөгөө өгч;
• БНСУ-ын хуулийн фирмийн өмгөөлөгч Ну Дун Хёг, Лим Тэг Сог, Жин Син Ил болон БНСУ-ын Захиргааны байгууллага болох Гадаадын иргэн харьяатын газрын захиргааны хуульч Ким Вол Сү нар БНСУ-ын виз, оршин суух зөвшөөрөл, хөдөлмөрийн маргаан, үйлдвэрлэлийн осол, гэр бүл, эрүүгийн  хэргийн чиглэлээр иргэдэд зөвлөгөө өгч ажилласан.

“Зөвлөх үйлчилгээний өдөрлөг”-өөр 40 гаруй Монгол иргэн Монгол, Солонгос өмгөөлөгч нараас зөвлөгөө авсан бөгөөд иргэдийн дийлэнх хувь нь оршин суух визний талаарх зөвлөгөө авсан байна.

Өдөрлөгийн үеэр БНСУ-ын Захиргааны байгууллага болох Гадаадын иргэн харьяатын газрын захиргааны хуульч Ким Вол Сү-тэй БНСУ-д оршин суугаа Монгол иргэдийн визтэй холбоотой асуудлаар хамтран ажиллах санамж бичиг байгууллаа.

2023 оны 04 дүгээр сарын 17-ны өдрийн арга хэмжээний хүрээнд БНСУ-ын Гадаад худалдаа, хөрөнгө оруулалтыг дэмжигч агентлаг буюу “КOTRA” корпорацын дэмжлэгтэйгээр Монгол Улсад бизнес эрхлэх сонирхолтой БНСУ-ын бизнес эрхлэгч 20 орчим хуулийн этгээдийн төлөөлөлд Монгол улсад Хөрөнгө оруулалт хийхтэй холбоотой хууль, эрх зүйн чиглэлээр зөвлөгөө мэдээлэл өгсөн.

Уг арга хэмжээнд МУ-аас БНСУ-д суух Элчин сайдын яамны консул Ц.Анхбаяр мэндчилгээ дэвшүүлэн МУ-ын хөрөнгө оруулалтын бодлогын талаарх мэдээллийг танилцууллаа.