Монголын Хуульчдын холбоо нь нийслэл болон орон нутгийн хуульчдын мэдлэгийг дээшлүүлэх, эрх ашгийг хамгаалах чиглэлээр үйл ажиллагаа явуулсаар ирсэн. Энэ жилийн хувьд холбооны 10 жилийн ой тохиож байгаатай холбогдуулан  2023 оныг хуульчийн нэр хүндийг өсгөх жил болгон зарлаж, орон нутгийн хуульчдад холбооны үйл ажиллагааг таниулах, хуульчийн үргэлжилсэн сургалт зохион байгуулах зорилгоор 21 аймагт орох хуульчийн үргэлжилсэн сургалтыг Өвөрхангай аймгаас эхлэн зохион байгуулж байна.

Өвөрхангай, Баянхонгор аймгийн хуульчдаас авсан судалгааны дүнд өндөр санал авсан сэдвийн дагуу хуульчдын хэрэгцээ шаардлагад нийуүүлэн хөтөлбөр боловсруулан, эхний өдрөө сургалтыг амжилттай зохион байгуулж байна. Сургалтыг Хуульчдын холбооны Тамгын газрын дарга Ш.Жолбарс нээж үг хэлсэн бөгөөд сургалтад прокурор, өмгөөлөгч, бусад хуульчдаас бүрдсэн нийт 40 гаруй хуульч хамрагдаж байна.

Сургалт 2 өдөр үргэлжлэх бөгөөд дараах сэдвээр сургалт явагдана. Үүнд:

• “Цахим гэмт хэрэг”, “Хүүхэд хамгаалал ба хэрэг хянан шийдвэрлэх ажиллагаа”  сэдвээр Хуульчдын холбооны сургагч багш, Зөвлөлийн гишүүн Г.Оюунболд;
• “Гэрч, хохирогчийг хамгаалах үйл ажиллагаа, түүний эрх зүйн зохицуулалт” сэдвээр Монголын Хуульчдын холбооны сургагч багш, цагдаагийн хошууч, докторант Д.Энх-Амгалан;
• “ЗЕХ §47: Захиргааны акт илт хууль бус болох нь” сэдвээр Монголын Хуульчдын холбооны сургагч багш, Нийслэл дэх захиргааны хэргийн анхан шатны шүүхийн шүүгч Т.Мөнх-Эрдэнэ, “Өмгөөллийн Анта Партнерс” ХХК-ийн ерөнхий захирал Д.Түвшинтамир.