Монголын Хуульчдын холбооны Зөвлөлийн 2023 оны долдугаар сарын 5-ны ээлжит бус хурлаар Хуульчийн мэргэжлийн шалгалтыг аравдугаар сарын 23-ны өдрөөс 28-ны өдрүүдэд Улаанбаатар хотод зохион байгуулахаар товлосон. Хуульчийн эрх зүйн байдлын тухай хуулийн 14 дүгээр зүйлийн 14.2 дахь хэсэгт “Хуульчийн шалгалтын товыг уг шалгалт эхлэхээс 75-аас доошгүй хоногийн өмнө хэвлэл мэдээллийн хэрэгслээр нийтэд зарлана.” гэж заасны дагуу Шалгалтын зохион байгуулалтын комиссоос хэвлэлийн бага хурлыг 2023 оны 07 сарын 27-ны өдөр хийлээ. Хэвлэлийн бага хурлаар Хуульчийн мэргэжлийн шалгалтын тов, хуульчийн мэргэжлийн дадлагад тооцох ажил, мэргэжил, шалгалтын хураамжийн талаар болон бодлого бодох аргачлалын сургалттай холбоотой мэдээллийг Хуульчдын холбооны Тамгын газрын дарга Ш.Жолбарс, Шалгалтын хорооны гишүүн, шүүгч Т.Мөнх-Эрдэнэ, прокурор Б.Эрхэмбаяр, Шалгалтын зохион байгуулалтын комиссын гишүүн Д.Оросоо, Б.Баасандорж нар тус тус өглөө. Хуульчийн мэргэжлийн шалгалтын бүртгэл 2023 оны 07 дугаар сарын 27-ны өдрийн 12:00 цагт эхэлж, 09 дүгээр сарын 09-ний өдрийн 00:00 цагт хаагдана. Шалгалтын бүртгэлийг https://burtgel.mglbar.mn/ хаягаар бүртгэнэ.
