Сүүлийн жилүүдэд уур амьсгалын өөрчлөлтийн нөлөө дэлхий даяар хүчтэй мэдрэгдэж, үүний үр дагавар болох хэт халалт, томоохон үер, ган, зунд зэрэг байгалийн гамшиг Монгол Улсад ч тохиолдсоор байгаа өнөөдрийн нөхцөл байдалд уур амьсгалын өөрчлөлт болон байгаль орчны асуудлаар хүн бүрийн оролцоо чухал бөгөөд тэр дундаа залуусын оролцоог нэмэгдүүлэх нь онцгой ач холбогдолтой.
Уур амьсгалын өөрчлөлттэй тэмцэх, байгаль орчныг хамгаалахад энэ салбарын мэргэжилтнүүдээс гадна энэ чиглэлийн суурь ухагдахуун, мэдлэг, мэдээлэлтэй хуульч, өмгөөлөгч, эрх зүйчдийн оролцоо чухал боловч байгаль орчны чиглэлээр мэргэшин ажиллаж байгаа хуульчдын тоо практикт үүсээд байгаа хүндрэл, бодит нөхцөл байдалтай харьцуулахад туйлын хангалтгүй байна.
Монголын Хуульчдын Холбооны зүгээс Монгол Улс дахь Нэгдсэн Үндэстний байгууллага, НҮБ-ын Нийгэмлэг болон энэхүү хөтөлбөрийн зохион байгуулагч бусад байгууллагуудтай хамтран уур амьсгалын өөрчлөлттэй тэмцэх, байгаль орчны хүндрэлүүдийг шийдвэрлэхэд залуу хуульч, эрх зүйч, хуулийн сургуулийн оюутнуудын идэвхийг нэмэгдүүлэх зорилгоор “НҮБ-ын Залуу Төлөөлөгч - Байгаль Орчны Манлайлал 2023” хөтөлбөрийн нийт 30 оролцогчийн 10 оролцогчийг нь хууль зүйн салбараас шалгаруулсан. Хөтөлбөрөөр дамжуулан хуульч, эрх зүйчдийг байгаль орчны салбарт ажиллах чадавхтай боловсон хүчин болгон бэлтгэх, энэ чиглэлээр олон улс, бүс нутгийн хэмжээнд ажиллах чадавхтай шинэ залуу хуульчдыг бэлтгэх нь МХХ-ны энэхүү хөтөлбөртэй хамтарч байгаа гол зорилго юм.
Мөн 2024 оны 2-3 дугаар сард Кени Улсын Найроби хотод зохион байгуулагдах НҮБ-ын Байгаль орчны Ерөнхий ассамблейд эх орноо төлөөлөн оролцох оролцогчийг хөтөлбөрт оролцож байгаа хуульч, эрх зүйч, хуулийн сургуулийн оюутнууд дундаас шалгаруулах болсон нь МХХ-ноос урьд өмнө хуульч, эрх зүйчдийн дунд зохиогдож байгаагүй шинэлэг үйл ажиллагаа болж байгаагаар онцлог юм.
