Монгол Улсын Ерөнхийлөгчийн Тамгын газар, Монгол Улс дахь НҮБ-ын Суурин зохицуулагчийн газар, НҮБ-ын Нийгэмлэг НҮТББ, Монголын Хуульчдын Холбоо болон холбогдох бусад байгууллагаас хамтран хэрэгжүүлж байгаа “НҮБ-ын Залуу төлөөлөгч – Байгаль орчны манлайлал 2023” хөтөлбөрт хамрагдаж байгаа хуульч, эрх зүйч, хуулийн сургуулийн оюутнуудын дунд “Хуульчдын мэтгэлцээний тэмцээн”-ийг 2023 оны 11-р сарын 25-ны өдөр амжилттай зохион байгууллаа. Тус тэмцээнийг дэлхийн хүлэмжийн хийн ялгарлыг бууруулах хоёр үндсэн чиг хандлага болох “Carbon Taxes versus Cap and Trade” гэсэн ерөнхий сэдвийн хүрээнд зохион явуулав.
Тэмцээний шүүгчээр Монголын Хуульчдын холбооны Зөвлөлийн гишүүн, Хуульчдын эрх, хууль ёсны ашиг сонирхлыг хамгаалах хорооны тэргүүн, өмгөөлөгч Ш.Алтангадас, Отгонтэнгэр их сургуулийн Хууль зүйн сургуулийн ахлах багш, хуульч, өмгөөлөгч Б.Мөнхзаяа, МахониЛиотта ХХН хуулийн фирмийн партнер Д. Номин нар тус тус ажиллалаа.
Шүүгчдийн нийлбэр дүнгээр “НҮБ-ын Залуу төлөөлөгч – Байгаль орчны манлайлал” хөтөлбөрийн оролцогч, хуульч О.Мөнхнасан нэгдүгээр байр эзэлсэн бол, оролцогч А.Бямбадалай хоёрдугаар байр эзэллээ.
Хөтөлбөрийн хууль, эрх зүйн салбарын нэг шилдэг оролцогч 2024 оны 02-р сарын 26-ны өдрөөс 03-р сарын 01-ний өдрүүдэд Бүгд Найрамдах Кени Улсын нийслэл Найроби хотод зохион байгуулагдах “НҮБ-ын Байгаль орчны ассамблей”-д оролцох юм.
