2023 оны 12 дугаар сарын 08-ны өдөр Монголын Хуульчдын холбоо, Захиргааны эрх зүйн хороо, Байгаль орчны эрх зүйн дэд хороо нь Монгол улсын Байгаль орчин, Аялал жуулчлалын яам, Дэ Нэйче Консерванси байгаль хамгааллын олон улсын байгууллага, Хүний эрхийг хамгаалах залуу хуульчдын клубтэй хамтран Байгаль орчны тухай хуулийн шинэчилсэн найруулгын төсөл боловсруулах ажлын хүрээнд хэлэлцүүлгийг амжилттай зохион байгууллаа.

Тус хэлэлцүүлгийн чиглүүлэгчээр Нээлттэй нийгэм форумын Засаглалын хөтөлбөрийн менежер Д.Эрдэнэчимэг, илтгэгчээр Монголын Хуульчдын холбооны Ерөнхийлөгч, хууль зүйн ухааны доктор П.Одгэрэл, Байгаль орчин аялал жуулчлалын яамны төрийн захиргаа удирдлагын газрын дарга Баярмаа, Отгонтэнгэр Их Сургуулийн Хууль зүйн сургуулийн багш хуульч, судлаач Р.Очирбал нар оролцож сонирхолтой илтгэж хэлэлцүүллээ.

Энэхүү хэлэлцүүлгээс дараах зарчмын шинжтэй үндсэн санал, санаачилга гарлаа.

1. Байгаль орчны тухай хуулийг дагаж гарсан журмуудыг уялдаа холбоог хангаж давхардсан шинжтэй ерөнхий зохицуулалтуудыг хуульд тусгах байдлаар системчлэх байдлаар шинэчлэх шаардлагатай.

2. Олон улсын байгаль орчны эрх зүйн үндсэн зарчмуудыг Байгаль орчны тухай хуульд тусгах шаардлагатай.

3. Байгаль орчны хамгааллын тогтвортой санхүүжилтийн асуудлыг шийдвэрлэх шаардлагатай.

4.Байгаль орчны талаар баримтлах дунд хугацааны бодлогын баримт бичгийг яаралтай боловсруулж батлуулах практик хэрэгцээ шаардлага үүсэж байгаа тул энэ тал дээр анхаарах зэрэг бодлогын болон хуулийн төслийн үзэл баримтлал тусгах шаардлагатай зэрэг саналууд гарлаа.