Монголын Хуульчдын холбооны Эдийн засгийн эрх зүйн хорооноос зохион байгуулдаг “LAW AND ECONOMICS” цуврал уулзалтын ээлжит хэлэлцүүлэг боллоо. Уулзалтыг Эдийн засгийн эрх зүйн хорооны 2024 оны үйл ажиллагааны төлөвлөгөөг сайжруулах, хуульчдын эрэлт хэрэгцээнд нийцсэн зорилтот арга хэмжээг зохион байгуулахад салбарын хуульчдын санал бодлыг сонсох, цаашдын үйл ажиллагаандаа тусгах зорилгоор зохион байгууллаа.

Уулзалтад санхүү, татвар, нягтлан бодох бүртгэл, арбитр, компанийн эрх зүй, үнэт цаасны эрх зүй, хөрөнгө оруулалтын эрх зүй, санхүү эдийн засгийн асуудлаар иргэн, эрүү, захиргааны эрх зүйн хууль зүйн зөвлөгөө, өмгөөллийн үйлчилгээг дагнан явуулдаг хуульч гишүүд оролцож чөлөөтэй ярилцаж, санал бодлоо илэрхийлэв.

Уулзалтын үеэр Монголын Хуульчдын холбооны Эдийн засгийн эрх зүйн хорооны тэргүүн Б.Баасандорж хорооны 2024 онд хийж хэрэгжүүлэх үйл ажиллагааны төлөвлөгөөг танилцуулж хуульчдын санал, зөвлөмжийг сонсохын зэрэгцээ хамтран ажиллах боломж, нөхцөлүүдийн талаар дэлгэрэнгүй мэдээлэл өгч Хорооны зүгээс хэрэгжүүлсэн үйл ажиллагааны талаар танилцууллаа.

Хорооны гишүүд, хуульчид хамтран ажиллах аливаа санал, санаачилгаа хороонд хэдийд ч чөлөөтэй, нээлттэй илэрхийлэх боломжтой бөгөөд Хорооны зүгээс хамтран ажиллахдаа таатай байх болно.

Уулзалтад цаг заваа гарган идэвхтэй оролцсон хуульчдадаа талархлаа.