Монголын Хуульчдын холбооны хүсэлтээр АНУ-ын Худалдааны яамны дэргэдэх Арилжааны эрх зүйн хөгжлийн хөтөлбөр (Commercial Law Development)-ийн дэмжлэгтэйгээр 2024 оны 03 дугаар сарын 04, 05-ны өдрүүдэд “Бизнесийн хэлэлцээр хийх арга зүй” сэдэвт сертификат олгох сургалтыг амжилттай зохион байгууллаа.
Сургалтыг Монголын Хуульчдын холбооны ерөнхийлөгч П.Одгэрэл, Арилжааны эрх зүйн хөгжлийн хөтөлбөрийн зөвлөх хуульч Гришма Прадхан нар нээсэн бөгөөд уг сургалтаар бизнесийн хэлэлцээр (commercial negotiation)-ийн үндсэн ойлголт (хэлэлцээрийн төрөл, аргууд, хэлэлцээр хийгчийн төрөл, ангилал), хэлэлцээрт хэрхэн бэлтгэх, хэлэлцээрийг хэрхэн удирдан явуулах, хэрхэн хаах зэрэг агуулгын хүрээнд дэд сэдэв болгон онолын болон практик асуудлуудыг хөндлөө.
Энэхүү сургалтыг “Clifford Chance” олон улсын хуулийн фирмийн Парис дахь салбарын Ахлах зөвлөх хуульч хатагтай Sandrine Colletier болон Сингапур дахь салбарын Ахлах хуульч ноён William Holmden нар өмгөөлөгч, хуульч нарт мэргэжлийн онцлогтой нь уялдуулан бодит жишээнд үндэслэн орсон бөгөөд, сургалтад хамрагдсан 52 хуульчид гэрчилгээ гардууллаа.
Монголын Хуульчдын холбооноос “Бизнесийн хэлэлцээр хийх арга зүй” сургалтыг видео хичээл хэлбэрээр гишүүн, хуульч нарт хүргэхээр бэлтгэл ажлыг хангаж байна.
