Монголын Хуульчдын холбооноос Олон улсын эмэгтэйчүүдийн эрхийг хамгаалах өдрийг тохиолдуулан өнөөдөр (2024.03.06) “Хөгжлийн бэрхшээл ба тэгш байдал” сэдвийн хүрээнд өглөөний уулзалт, ярилцлагыг зохион байгуулж 30 гаруй хуульч оролцож, санал солилцлоо.

Өглөөний уулзалтад Хөдөлмөр, нийгмийн хамгааллын яамны мэргэжилтэн, хөгжлийн бэрхшээлийн талаар ойлголт түгээх багш, трэйнэр, илтгэгч Б.Болороо оролцож Хөгжлийн бэрхшээлтэй хүмүүсийн эрхийн тухай НҮБ-ын конвенцийн хэрэгжилт болон Монгол Улсын Засгийн газрын 2, 3 дугаар нэгтгэсэн тайлангийн зөвлөмжийн хэрэгжилт, бодит нөхцөл байдал, эрх зүйн орчны талаар танилцуулав. Зочин хөтлөгчөөр Хуульчдын холбооны гишүүн хуульч, Өмгөөллийн Буяа энд партнерс ХХН үүсгэн байгуулагч Б.Буянжаргал оролцов.

Хөгжлийн бэрхшээлтэй хүний эрхийг хангах, улс төр, нийгмийн харилцаанд тэгш эрхтэйгээр оролцох эрх зүйн болон бусад орчныг шинэчлэх, хүртээмжтэй болгох, олон улсын жишигт хүргэх, Улсын Их Хурлаар хэлэлцүүлж, батлаж байгаа хууль тогтоомжийг хүний эрхэд нийцсэн, хөгжлийн бэрхшээлтэй иргэдэд тэгш хүртээмжтэй боловсруулах, батлах, бодлого боловсруулагчид төдийгүй нийгэм бүхэлдээ анхаарах шаардлагатай талаар оролцогчид хэлэлцүүлэг өрнүүллээ.