Монголын Хуульчдын холбооны Олон улсын эрх зүйн хорооноос санаачлан зохион байгуулж буй “ХУУЛЬ ЗҮЙН ҮЙЛЧИЛГЭЭ БА ХУУЛЬЧ - ҮЙЛЧЛҮҮЛЭГЧИЙН ХАРИЛЦАА (ОЛОН УЛСЫН ТУРШЛАГА)” сэдэвт хэлэлцүүлэг 2024 оны 03 дугаар сарын 05-ны өдөр боллоо.
Тус хэлэлцүүлэгт “Clifford Chance” олон улсын хуулийн фирмийн Парис хот болон Сингапур улс дахь салбар оффисуудын хуульчид болон Вашингтон ДиСи дэх АНУ-ын Худалдааны яамны Хуулийн зүйн газрын Өмгөөлөгч нар зочин панелистаар оролцлоо.
Хэлэлцүүлгээр зочин панелистууд нь олон улсын үйлчлүүлэгч нарт хил дамнасан өндөр үнийн дүн бүхий олон улсын гэрээ хэлэлцээрүүдэд зөвлөх үйлчилгээ үзүүлэх, олон улсын томоохон шүүхийн болон арбитрын хэрэгт өмгөөллийн үйлчилгээ үзүүлэх, дэлхийн өнцөг булан бүрт хэрэгжих буй мега төслүүдэд хууль зүйн зөвлөгөө өгч буй хуульчийн туршлагаасаа хуваалцаж ялангуяа эдгээр хууль зүйн үйлчилгээ дэх хуульч-үйлчлүүлэгч хоорондын харилцааны асуудлаар олон улсын туршлага хуваалцаж, чөлөөт яриа өрнүүллээ.
“Clifford Chance” олон улсын хуулийн фирм нь дэлхийн топ 10 том хуулийн фирмийн нэг бөгөөд нэг жилд ойролцоогоор 2.8 тэрбум ам.долларын орлоготой, 3700 орчим хуульчтайгаар үйл ажиллагаагаа явуулдаг хуулийн фирм юм.
Хүндэт зочин хатагтай Grishma Pradhan, Sandrine Colletier, ноён William Holmden болон нийт оролцогчиддоо баярлалаа.