Монголын Хуульчдын холбоо гишүүн хуульчдаа эрүүл мэндийн үзлэг, оношилгоонд хамруулах зорилгоор БНСУ-ын Сэжүнг Глобал компанитай “Хамтын ажиллагааны гэрээ” байгуулсан.
Энэхүү хамтын ажиллагааны хүрээнд хуульчид 2024 оны 02 дугаар сарын 25-29-ний өдрийн хооронд Бүгд Найрамдах Солонгос Улсын Пусан хот дахь Косин их сургуулийн дэргэдэх Нэгдсэн эмнэлэгт бүтэн биеийн үзлэг, оношлогоо, шинжилгээнд хамрагдахаас гадна байгалийн үзэсгэлэнт газар, түүхэн дурсгалт газруудтай танилцах аялалд хамрагдлаа.
Түүнчлэн хуульчдын бүрэлдэхүүнийг Пусан хотын шүүхийн Ерөнхий шүүгч Ким Жон Сү болон бусад шүүгчид хүлээн авч, эрүүгийн болон иргэний хэргийн маргаан шийдвэрлэх үйл явц болон шүүхийн цахимжилтын үйл ажиллагаатай танилцлаа.
Мөн Пусан хотын Иргэдийн хурлын төлөөлөгчдийн дарга Ан Сон Мин, өөрийн төөлөөлөгчдийн хамт хүлээн авч, уулзалт зохион байгуулж, Пусан хотын аялал жуулчлалын салбарын хөгжлийн талаар бидний сонирхсон асуултад хариулт өглөө.
Монголын Хуульчдын холбооны Тамгын газрын дарга Ш.Жолбарс, Косин их сургуулийн эмнэлэгийн захирал О Гён Сэүн нар цаашид хуульчдын эрүүл мэндийн үзлэг шинжилгээнд тогтмол, хөнгөлөлттэй нөхцөлөөр хамруулах, эмчилгээ хийлгэх чиглэлээр хамтран ажиллах санамж бичиг байгууллаа.
