Монголын Хуульчдын холбооны Ерөнхийлөгч П.Одгэрэл Олон Улсын Улаанбаатарын их сургуулийн Монгол-Солонгосын эрх зүйн хүрээлэнгийн захирал О.Амарсанаа нар хамтын ажиллагааны санамж бичигт гарын үсэг зурлаа.
Санамж бичгийн хүрээнд талууд олон улсын хурал зөвлөгөөн форумд хамтран оролцох Хуульчдын холбоо, Монгол-Солонгосын эрх зүйн хүрээлэн болон БНСУ-ын Гёнги өмгөөлөгчдийн холбоо, холбогдох хуулийн байгууллага, их сургуулиудтай хамтарсан эрдэм шинжилгээний хурал, хэлэлцүүлэг зохион байгуулах чиглэлээр хамтран ажиллана.
Тус уулзалтад Хуульчдын холбооны Тамгын газрын дарга Ш.Жолбарс, Хуульчийн үргэлжилсэн сургалтын асуудал эрхэлсэн хорооны дарга Б.Өнөрмаа болон Олон Улсын Улаанбаатарын их сургуулийн Гадаад харилцааны албаны дарга Юн Жүн Ху нар оролцлоо.
Монгол-Солонгосын эрх зүйн хүрээлэн нь Олон улсын Улаанбаатарын их сургуулийн харьяа судалгааны төв бөгөөд 2023 оны 2 дугаар сард үүсгэн байгуулагдсан бөгөөд эрх зүйн бакалавр, магистрын түвшинд суралцагч оюутнуудаа судлаач оюутнаар дадлагжиж эрдэм шинжилгээ, судалгааны ажилд оролцох боломжоор хангадаг байна. Мөн Монгол, БНСУ-ын эрдэмтэн судлаачдаас бүрдсэн судлаачдын хамтарсан зөвлөлийг байгуулан олон улсын эрдэм шинжилгээ, судалгааны ажлыг тогтмол эрхлэн явуулдаг байна.
