Монголын Хуульчдын холбооноос Сонгуулийн Ерөнхий хороо, Монголын Өмгөөлөгчдийн холбоотой хамтран “УИХ-ын сонгуулийн эрх зүйн орчин, хууль хэрэглээ” сэдэвт сургалтыг 2024 оны дөрөвдүгээр сарын 26-ны өдөр зохион байгууллаа.

  Хуульчдыг мэргэшүүлэх тус сургалтын нээлтэд Монголын Хуульчдын холбооны Тамгын газрын дарга Ш.Жолбарс, Өмгөөлөгчдийн холбооны Ерөнхийлөгч Л.Данзанноров, СЕХ-ны Тамгын газрын дарга Д.Бат-Эрдэнэ нарын зочид оролцсон.

   Сургалтын хүрээнд СЕХ-ны Тамгын газрын дарга Д.Бат-Эрдэнэ Монгол Улсын Их хурлын сонгуулийн тухай хуулийн онцлог зохицуулалтууд болон Монгол Улсын Их хурлын сонгуулийн сурталчилгаа, хориглох зүйлийн талаар, Монголын Хуульчдын холбооны сургагч багш, хуульч Г.Оюунболд сонгуультай холбоотой маргааныг хянан шийдвэрлэх, сонгуулийн үеэр гардаг зөрчил, гэмт хэрэг болон сонгуулийн үйл ажиллагаанд хуульчийн үүрэг, оролцоо ямар байх талаар хичээл орсон. Мөн Монголын Хуульчдын холбооны Төлбөрийн чадваргүй иргэдэд хууль зүйн туслалцаа, өмгөөллийн үйлчилгээ үзүүлэх асуудал эрхэлсэн хорооны тэргүүн, өмгөөлөгч Р.Булгамаа УИХ-ын Сонгуулийн тухай хуулийн анхаарах зарим асуудлын талаар мэдээлэл өгсөн бөгөөд энэхүү сургалт нь сонгуулийн зөрчил, түүнээс урьдчилан сэргийлэх асуудал, хууль хэрэглээний талаар дэлгэрэнгүй мэдээлэл өгсөн ач холбогдолтой сургалт боллоо хэмээн оролцогчид онцоллоо. 

   УИХ-ын сонгууль болгох хугацаа дөхөж буйтайгаар холбоотой хуульчдад сонгуулийн эрх зүйн орчин, хууль хэрэглээний талаар мэдээлэл өгөх, мэргэшүүлэх зорилгоор зохион байгуулсан тус сургалтад 60 гаруй хуульч, өмгөөлөгч оролцож, тэдэнд батламж олгосон юм.