Монголын хуульчдын холбооны Захиргааны эрх зүйн хорооноос  “Монгол Улсын нийгмийн хамгааллын эрх зүйг боловсронгуй болгох нь: ХБНГУ-ын нийгмийн хамгааллын эрх зүй ба сайн туршлага” сэдэвт хэлэлцүүлгийг өнөөдөр зохион байгууллаа.

Тус хэлэлцүүлэгт Германы Касселын их сургуулийн Нийгмийн хамгаалал, эрүүл мэндийн эрх зүйн тэнхимийн профессор, Германы холбооны нийгмийн хамгааллын шүүхийн хүндэт шүүгч Феликс Вельти, Касселын их сургуулийн докторант, судлаач С.Амармэнд нар зочин илтгэгчээр оролцов.

Профессор, шүүгч Феликс Вельти “Германы нийгмийн хамгааллын эрх зүйн тусгай зохицуулалтууд ба нийгмийн хамгааллын шүүхийн үүрэг” сэдвээр, судлаач С.Амармэнд “Германы нийгмийн хамгааллын шүүхийн тогтолцоо” сэдвээр илтгэл хэлэлцүүллээ.

Илтгэгч нар Германы нийгмийн хамгааллын эрх зүйн зохицуулалтуудын тухай тайлбарласнаас гадна тус улсад нийгмийн хамгааллын дагнасан шүүхийн тогтолцоо ажилладаг тухай танилцуулж, нийгмийн хамгааллын эрх зүйд нийгмийн даатгалын сангуудын удирдлагын хэлбэр чухал тухай, Германд нийгмийн даатгалын сангуудыг Засгийн газраас бус, харин нийтийн эрх зүйн өөрийн удирдлага бүхий нэгдлүүд (сангууд) удирддаг тухай болон нийгмийн даатгал, халамжийн суурь асуудал нь иргэдийн орлогын хэмжээ байдаг гэх зэрэг олон чухал асуудлуудыг хөндлөө.

Тус хэлэлцүүлэгт Улсын дээд шүүхийн Захиргааны хэргийн танхимын тэргүүн, шүүгчид, Захиргааны хэргийн давж заалдах шатны болон Нийслэл дэх Захиргааны хэргийн анхан шатны шүүхийн шүүгчид, орон нутаг дахь Захиргааны хэргийн анхан шатны шүүхийн шүүгчид, Захиргааны эрх зүйн хорооны гишүүн хуульчид болон төрийн холбогдох байгууллагууд, судлаач, эрдэмтдийн төлөөлөл оролцов.