Цахим аюулгүй байдлын мэдээлэл удирдлагын төвөөс 12 дахь жилдээ зохион байгуулж буй "Cybersecurity Conference 2025"-д Монголын Хуульчдын холбооны Иргэний эрх зүйн хорооны тэргүүн Г.Даваадорж оролцлоо.
Тус үйл ажиллагаанд цахим аюулгүй байдалтай холбоотой сонирхолтой судалгаа, Монгол Улс руу чиглэсэн цахим халдлага, аюулгүй байдлын сүүлийн чиг хандлага, мэдээллийн аюулгүй байдлын тухай бодит кэйсүүдээр дүүрэн илтгэлийг оролцогчид толилуулжээ.
Мөн хэлэлцүүлэгт АНУ-ын "U.S. Speaker" хөтөлбөрийн хүрээнд зочин илтгэгчээр хүрэлцэн ирсэн, АНУ-ын Зэвсэгт хүчин, Холбооны мөрдөх товчоо зэрэгт 35 жил ажилласан туршлагатай Кибер аюулгүй байдлын мэргэжилтэн М.К. Палмор оролцсон байна. Түүнчлэн, "Харуул Занги 2025" Ёс зүйт хакерын тэмцээний финалын тоглолт болсон нь хөтөлбөрийн нэгэн сонирхолтой хэсэг болжээ.
Цахим шилжилт эрчимтэй явагдаж байгаа өнөө үед манай улсын хуулийн салбарын Кибер аюулгүй байдал бидний анхаарлыг татаж байгаа билээ. Учир нь шүүх эрх мэдлийн байгууллагын мэдээллийн системүүдэд хуримтлагдаж буй өгөгдөл нь зөвхөн иргэдийн хувийн мэдээлэл төдийгүй төр, байгууллагын нууц баримтуудыг агуулдаг. Тиймээс аливаа кибер халдлагын эрсдлийг бууруулахад хувийн болон байгууллагын дотоод зохион байгуулалт, хүний нөөцийн чадавхи, технологийн дэд бүтэц, тогтвортой хөрөнгө оруулалт зэрэг нь кибер аюулгүй байдлыг хангах гол түлхүүр болж байна.
