Монголын Хуульчдын холбоо нь “Иргэний үндсэн эрх, хөгжил” ТББ-тай хамтран ажиллах санамж бичиг байгуулж, өнөөдөр Монголын Хуульчдын холбооны Ерөнхийлөгч М.Мөнхбат, “Иргэний үндсэн эрх, хөгжил” ТББ-ын Удирдах зөвлөлийн дарга Ц.Цэцэнбаатар нар гарын үсэг зурж баталгаажууллаа.

Монгол Улсад хэрэг, маргааныг эвлэрүүлэн зуучлалаар шийдвэрлэхийн ач холбогдлыг хуульчид, олон нийтэд таниулах, сурталчлах болон эвлэрүүлэн зуучлагчийн ур чадварыг дээшлүүлэх, хөгжлийн чиглэлийн бусад олон талт ажлуудыг зохион байгуулах зорилгоор энэхүү санамж бичгийг байгуулсан бөгөөд талууд дотоод болон гадаадын эрдэмтэн судлаач, мэргэжилтэн, зөвлөхүүдтэй туршлага солилцох, хамтран ажиллах, эрдэм шинжилгээний хурал, зөвлөгөөн, илтгэл хэлэлцүүлэг зохион байгуулах болон тодорхой сэдвийн хүрээнд олон улсын болон бүс нутгийн чанартай уулзалт, хурал, зөвлөгөөн зохион байгуулах, хамтарсан төсөл хөтөлбөр хэрэгжүүлэх, олон нийтийн эрх зүйн боловсролыг дээшлүүлэх, хамгааллыг хөгжүүлэхэд хувь нэмэр оруулах, нөлөөллийн үйл ажиллагаа явуулах, оюутнуудыг дадлагажих, мэргэшихэд дэмжих, хуульч, багш, судлаач болон хууль зүйн салбарт ажиллагсдын ур чадварыг дээшлүүлэх үйл ажиллагаа, хөтөлбөр зохион байгуулах зэрэг ажлыг хамтран хэрэгжүүлэхээр боллоо.

Энэ санамж бичгийн хүрээнд эхний ээлжид Сингапурын “ALLEN & GLENDHILL” хуулийн фирмийн партнер хуульч,Эвлэрүүлэн зуучлагч, багш Лэй Тэнээр арилжааны эвлэрүүлэн зуучлал болон ажлын байран дахь эвлэрүүлэн зуучлалын талаар урт хугацааны цахим, танхиим хосолсон сургалтыг зохион байгуулахаар ярилцлаа.

Тус санамж бичиг зурах ёслолын ажиллагаанд Монголын Хуульчдын холбооны Тамгын газрын дарга Ш.Жолбарс, Эвлэрүүлэн зуучлалыг дэмжих хорооны Тэргүүн Д.Түмэнжаргал, Удирдах зөвлөлийн гишүүн Г.Халиун, Ц.Амарсанаа болон холбогдох албаны хүмүүс оролцсон.