Монголын Хуульчдын холбооны Эрүүгийн эрх зүйн хорооноос АНУ-ын Техас мужийн хууль зүйн салбарын төлөөлөгчидтэй хамтран “Нууц мөрдөх ажиллагаанд хүний эрхийг хангах - нотлох баримт үнэлэх” сэдэвт өглөөний уулзалт, хэлэлцүүлгийг зохион байгууллаа.
Энэхүү хэлэлцүүлэгт Эрүүгийн хэргийн шүүгч нар болон нийслэлийн прокурорын газрын прокурорууд, хуульч, өмгөөлөгч, судлаачдын төлөөлөл оролцож, эрүүгийн эрх зүйн тулгамдсан асуудлаар чөлөөт хэлэлцүүлэг өрнүүлсэн.
Хэлэлцүүлгийн үеэр зочноор шүүгч Mathew Wright, АНУ-ын Техас мужийн хуульчдын холбооны ерөнхийлөгч Sarah Keathley нар оролцож, АНУ-ын Техас мужийн шүүхийн тогтолцоо болон нууц мөрдөх ажиллагааны явцад цугларсан нотлох баримтыг шүүхээс үнэлэхэд анхаардаг гол шалгуурууд, хүний эрхийн баталгааны талаар, хоёр улсын хуульч, өмгөөлөгч, шүүгчдийг харилцан туршлага судлуулах, олон улсын эрх зүйн практиктай танилцах талаар туршлага хуваалцлаа.
Хэлэлцүүлэгт оролцсон хуульчид сонирхсон асуултдаа хариулт авч, АНУ-ын эрүүгийн эрх зүйн практик болон Монгол Улсын эрх зүйн орчныг харьцуулан, харилцан үр дүнтэй санал солилцсон бүтээлч уулзалт боллоо.
