Монголын Хуульчдын холбооны Эвлэрүүлэн зуучлалыг дэмжих хорооны Удирдах зөвлөл 2026 оны 05 дугаар сарын 26-ны өдөр хуралдлаа.

Хурлаар шинээр сонгогдсон Удирдах зөвлөлийн гишүүн Т.Болормаа, Ө.Одончимэг, Ж.Баянжаргал нарыг танилцуулж, хорооныхоо үйл ажиллагаанд идэвх санаачилгатай оролцох болон хорооноос 2026 онд хэрэгжүүлэх ажлын талаар мэдээлэл өгсөн.

Монголын Хуульчдын холбооны Эвлэрүүлэн зуучлалыг дэмжих хороо нь Сингапурын Хуульчдын холбоо(Law Society of Singapore)-той 2026 оны наймдугаар сарын 26-нд,  Сингапурт төвтэй, олон улсын хэмжээнд хүлээн зөвшөөрөгдсөн эвлэрүүлэн зуучлах боловсрол, сургалт болон зөвлөх үйлчилгээ үзүүлдэг тэргүүлэх байгууллага болох "SAGE" Эвлэрүүлэн зуучлалын хүрээлэнтэй 2026 оны наймдугаар сарын 25-нд санамж бичиг байгуулахаар урилга хүлээн авсан бөгөөд хурлаар тус хамтын ажиллагааны санамж бичгийн төслийг хэлэлцэн, санал авсан юм. Мөн хурлаар Эвлэрүүлэн зуучлалыг дэмжих хорооны гишүүдийн нээлттэй өдөрлөгийг 2026 оны зургадугаар сарын 13-нд зохион байгуулахаар шийдвэрлэлээ.

Түүнчлэн хурлаар “Хуульчдын спортын наадам-2026” спортын тэмцээнд Хорооноос оролцсон байдлын талаар мэдээлэл өгсөн бөгөөд Эвлэрүүлэн зуучлалын хороо нь анх удаа спортын бүх төрөлд баг бүрдүүлэн оролцож, багийн дүнгээр зургадугаар байрт шалгарч, эмэгтэй сагсан бөмбөгийн багийн тамирчид гуравдугаар байрт шалгарсан амжилттайгаар тэмцээнийг өндөрлүүлсэн билээ.