Захиргааны эрх зүйн хорооноос зохион байгуулдаг "Миний дуртай захиргааны эрх зүй" цуврал уулзалтыг өнөөдөр “Хүүхэд, гэр бүлийн шүүх бэлэн үү?” сэдвээр зохион байгууллаа. Тус уулзалтын панелистаар УИХ-ын гишүүн, хуульч Х.Баасанжаргал, модератороор Хүүхдийн эрх зүйн дэд хорооны зохицуулагч Г.Бат-Отгон оролцов.
Тус уулзалтаар Гэр бүлийн тухай хуулийн шинэчилсэн найруулга, Гэр бүлийн хэрэг шүүхэд хянан шийдвэрлэх тухай хуулийн үзэл баримтлал, хуулиар зохицуулах шинэлэг харилцааны талаар мэдээлэл хуваалцаж, шинээр байгуулагдан ажиллах Гэр бүл, хүүхдийн хэргийн дагнасан шүүхийн үйл ажиллагааны үндсэн концепци, тус шүүхийн хэргийн харьяалал, хүүхдийн эрх, ашиг сонирхлыг тэргүүн ээлжид хамгаалах зарчим зэрэг хэрэг хянан шийдвэрлэх ажиллагааны зарчим, гэр бүлийн нөхцөл байдлын мэргэжилтний эрх зүйн байдал зэрэг олон асуудлын хүрээнд хуульчид харилцан ярилцаж, санал бодлоо солилцсон юм.
