Ирланд Улсын Дээд шүүх 2026 оны зургадугаар сарын 3-наас эхлэн эвлэрүүлэн зуучлал болон маргаан шийдвэрлэх өөр хувилбарын талаарх хуулийн шаардлагыг чанд мөрдүүлэх шинэ удирдамж хэрэгжүүлж эхэллээ.
Дээд шүүхийн дарга Дэвид Барнивилл 2026 оны тавдугаар сарын 20-нд "Practice Direction HC141"-ийг баталж, 2017 оны Эвлэрүүлэн зуучлалын тухай хууль болон шүүхийн бус журмаар маргаан шийдвэрлэхтэй холбоотой бусад хууль тогтоомжийн хэрэгжилтийг хангуулахыг хуульчид, шүүхэд оролцогч талуудад сануулжээ.
Удирдамжийн дагуу өмгөөлөгчид иргэний хэрэг үүсгэхээс өмнө үйлчлүүлэгчдээ эвлэрүүлэн зуучлалын боломж, түүний давуу тал, үйлчилгээ үзүүлэгчдийн талаарх мэдээллийг өгөх үүрэгтэй. Мөн уг үүргээ биелүүлсэн талаараа шүүхэд хууль ёсны мэдүүлгээр баталгаажуулах шаардлагатай. Хэрэв тухайн мэдүүлгийг шүүхэд ирүүлэхгүй бол хэрэг хянан шийдвэрлэх ажиллагааг тус шаардлагыг биелүүлэх хүртэл хойшлуулж болзошгүй бөгөөд ажиллагаа саатах, нэмэлт зардал гарах, цаашлаад мэргэжлийн хариуцлагын асуудал үүсэх эрсдэлтэй.
"Practice Direction HC141"-д эвлэрүүлэн зуучлал нь сайн дурын ажиллагаа хэвээр байхыг онцолсон ч шүүхээс санал болгосон тохиолдолд эвлэрүүлэн зуучлалд оролцохоос үндэслэлгүй татгалзах нь шүүхийн зардлын шийдвэрт сөргөөр нөлөөлж болзошгүй гэж дурджээ.
Шинэ удирдамж нь иргэний болон гэр бүлийн маргааныг шүүхийн шатанд хүргэхээс өмнө эвлэрүүлэн зуучлал, шүүхийн бус журмаар шийдвэрлэх боломжийг нэмэгдүүлэх зорилготой аж. Мөн 2024 оны Гэр бүлийн шүүхийн тухай хуульд тусгагдсан маргаан шийдвэрлэх зарчмуудыг хэрэгжүүлэх бэлтгэл ажлын нэг хэсэг гэж үзжээ.
Дээрх зохицуулалт хэрэгжсэнээр Ирландад эвлэрүүлэн зуучлалын хэрэглээ нэмэгдэж, хуульчид үйлчлүүлэгчдээ маргаанаа шүүхийн бус журмаар шийдвэрлэх боломжийн талаар илүү тодорхой зөвлөгөө өгөх шаардлагатай тулгарч байна.
