Монголын Хуульчдын холбооны Ерөнхийлөгч М.Мөнхбат 2026 оны наймдугаар сарын 24-28-ны өдрүүдэд Сингапурт албан айлчлал хийж байна.
Айлчлалын хүрээнд Монголын Хуульчдын холбоо болон Сингапурын Хуульчдын холбоо хооронд хоёр улсын хуульчдын мэргэжлийн хамтын ажиллагааг бэхжүүлэх, эрх зүйн мэдлэг, туршлага солилцох боломжийг нэмэгдүүлэх зорилгоор хамтран ажиллах санамж бичиг байгууллаа.
Санамж бичигт Монголын Хуульчдын холбооны Ерөнхийлөгч М.Мөнхбат, Сингапурын Хуульчдын холбооны Ерөнхийлөгч Tan Cheng Han нар гарын үсэг зурж баталгаажуулсан бөгөөд энэхүү санамж бичиг нь хоёр улсын хуульчдын байгууллагуудын хамтын ажиллагааг шинэ түвшинд гаргах чухал алхам боллоо.
Санамж бичиг зурах ёслолын ажиллагаанд Сингапурын Хуульчдын холбоог төлөөлөн Дэд ерөнхийлөгч Dinesh Singh Dhillon, Удирдах зөвлөлийн гишүүд Lim Seng Siew, Paul Tan Beng Hwee, Tanguy Lim, Mori Ong нар оролцсон бол Монголын талаас Эвлэрүүлэн зуучлалын асуудлыг дэмжих хорооны тэргүүн Д.Түмэнжаргал, тус хорооны Удирдах зөвлөлийн гишүүд болон Олон Улсын эрх зүйн хорооны тэргүүн Э.Алимаа нарын төлөөлөл оролцсон.
Энэхүү санамж бичиг нь Монгол болон Сингапурын хуульчдын байгууллагуудын хамтын ажиллагааг шинэ шатанд гаргаж, олон улсын арбитр, эвлэрүүлэн зуучлал, хил дамнасан маргаан шийдвэрлэлт, LegalTech, хиймэл оюун ухаан болон хууль зүйн үйлчилгээний шинэ чиглэлүүдээр мэдлэг, туршлага солилцох чухал суурь болж байгааг талууд онцолсон.
Цаашид талууд хамтарсан хөтөлбөр, сургалт, судалгааны ажлуудыг үе шаттайгаар хэрэгжүүлж, Монгол, Сингапурын хуульчдын мэргэжлийн хамтын ажиллагааг бодит үр дүнд чиглүүлэн хөгжүүлэхээр ажиллах юм.
