Монголын Хуульчдын холбоо болон хууль хяналтын байгууллагын төлөөлөгчид Бүгд Найрамдах Ардчилсан Лаос Ард Улс /БНАЛАУ/-д айлчилж тус улсын хууль, хяналтын байгууллагуудтай танилцаж туршлагаа хуваалцлаа.
Азийн Сангийн Монгол Улс дахь төлөөлөгчийн газраас зохион байгуулсан энэхүү үйл ажиллагааны хүрээнд өнгөрөгч оны есдүгээр сард тус улсын хууль хяналтын байгууллагын төлөөлөгчид манай улсад зочилсон юм.
2023 оны 02 дугаар сарын 06-наас 11-ний өдрүүдэд БНАЛАУ-ын Вьентьян хотноо болсон тус айлчлалд Монгол Улсын дээд шүүх, Чингэлтэй дүүргийн анхан шатны шүүх, Улсын ерөнхий прокурорын газрын дэргэдэх Сургалт, суддалгааны хүрээлэн, Шүүхийн сургалт, судалгаа, мэдээллийн хүрээлэн, Монголын Хуульчдын Холбоо, МУИС-ийн Хууль зүйн сургууль, Азийн Сангийн төлөөлөгчдөөс бүрдсэн 13 хүний бүрэлдэхүүнтэй баг оролцлоо.
Айлчлалын хөтөлбөрт БНАЛАУ-ын Прокурорын байгууллага, Хууль зүйн үндэсний хүрээлэн, Ардын дээд шүүх, Ардын дээд шүүхийн дэргэдэх Судалгаа, сургалтын хүрээлэн, Хуульчдын холбоо зэрэг байгууллагуудад зочлох үеэр Монгол Улсын шүүх, прокурор, хуульчдын дунд хэрэгжүүлж буй залуу хуульчийг чадавхжуулах хөтөлбөрийн хэрэгжилт болон менторшип хөтөлбөрийн тухай танилцуулга, мэдээллийг солилцож сайн туршлагаа хуваалцсан юм.
