Олон улсын эмэгтэйчүүдийн эрхийг хамгаалах өдрийг тохиолдуулан Монголын Хуульчдын холбоо санаачлан УЕПГ, “Хуульч эмэгтэй” клубтэй хамтран 2023 оны гуравдугаар сарын 06-ны  өдөр хуульчийн мэргэжлийн үйл ажиллагаа эрхэлж буй эмэгтэйчүүдтэй өглөөний чөлөөт уулзалт зохион байгууллаа. Тус үйл ажиллагааг Грата интэрнэйшнл, Ананд Адвокаст өмгөөллийн нөхөрлөл дэмжин ажиллав. Уулзалтаар шүүгч, прокурор, өмгөөлөгч, нотариатч, өмгөөллийн нөхөрлөлийн хуулийн зөвлөх зэрэг 50 гаруй хуульч оролцож эмэгтэйчүүдийн манлайлал, тулгамдаж буй асуудлын талаар чөлөөт яриа өрнүүллээ. 

     Монголын Хуульчдын холбооны Ерөнхийлөгч П. Одгэрэл уулзалтын үеэр Монголын Хуульчдын холбооны нийт гишүүдийн  60 орчим хувийг эмэгтэйчүүд бүрдүүлж байгааг цохон тэмдэглэж  хуульчийн мэргэжлийн үйл ажиллагаа эрхэлж буй эмэгтэйчүүдийг дэмжих, тэдний оролцоо, манлайллыг нэмэгдүүлэх, тулгарч буй асуудал, бэрхшээлийг шийдвэрлэхтэй холбоотойгоор судалгаа хийх, төсөл хөтөлбөр боловсруулах, бодлогын түвшинд өөрчлөлт гаргах нөлөөллийн ажлыг хэрэгжүүлэх чиглэлээр идэвхтэй ажиллахад онцгой анхаарахаа илэрхийллээ.

    Өглөөний уулзалтад оролцсон хуульч эмэгтэйчүүд Хуульчдын дундын үнэт зүйлсийг тодорхойлох, ажил, амьдралын сайн туршлагаа хуваалцах,  мэргэжлийн үйл ажиллагаа эрхлэхэд тулгарч буй бэрхшээлүүдийг шийдвэрлэх, орон нутагт ажиллаж буй хуульчдад хүрч ажиллах, төрийн бодлого төлөвлөлтөд хуульч эмэгтэйчүүдийг идэвхтэй оролцуулах зэрэг сэдвүүдийн хүрээнд санал солилцож, эдгээрийг ажил хэрэг болгоход чиглэсэн арга хэмжээ, уулзалтуудыг тогтмол хийх санал гаргасан юм.