Монголын Хуульчдын холбооны Ерөнхийлөгч П.Одгэрэл Олон улсын эрх зүйн хөгжлийн байгууллага (IDLO)-ын Монгол дахь суурин төлөөлөгч ноён Стивен Кентийг хүлээн авч уулзлаа.

      Монголын Хуульчдын холбоо нь 2016 оноос хойш Олон улсын эрх зүйн хөгжлийн байгууллага (IDLO)-тай хамтран ажиллаж байгаа бөгөөд уулзалтын эхэнд талууд 2019 онд хамтран ажиллахаар байгуулсан санамж бичгийн хүрээнд хэрэгжүүлсэн гэр бүл, жендэрт суурилсан хүчирхийлэлтэй тэмцэх, хүчирхийллийн хохирогчдод чиглэсэн үйл ажиллагаа явуулах, хууль зүйн үйлчилгээ үзүүлдэг хуульч, өмгөөлөгчдийг чадавхжуулах, сургагч багш бэлтгэхэд чиглэсэн сургалтуудын үр дүн, эерэг нөлөөллийн талаар санал солилцлоо. 

   Мөн Олон улсын эрх зүйн хөгжлийн байгууллагын хэрэгжүүлж буй Жендэрт суурилсан хүчирхийллийн эсрэг хөтөлбөрийн хоёр дахь үе болон хүүхэд хамгаалал, эвлэрүүлэн зуучлалын чиглэлээр Монголын Хуульчдын холбооны Эдийн засгийн эрх зүй,  Эвлэрүүлэн зуучлалын үйл ажиллагааг дэмжих хороо (Хүүхдийн эрхийн дэд хороо)-дын төлөөлөлтэй уулзалт зохион байгуулж, цаашдын хамтын ажиллагаагаа өргөжүүлэхээр боллоо. 

      Уулзалтад Хуульчдын холбооны Тамгын газрын дарга Ш. Жолбарс, “Хуульч эмэгтэй” клубын тэргүүн Н.Энхцэцэг, Олон улсын эрх зүйн хөгжлийн байгууллагын хөтөлбөрийн менежер А.Жаргалан, зохицуулагч С.Одончимэг нар оролцлоо.