МУИС-ийн ХЗС-ийн багш, хууль зүйн ухааны доктор Т.Золбоо “Гэмт хэргийн бүрэлдүүн”, “Эрүүгийн эрх зүй /Ерөнхий анги/”,  “Сургалтын эрүүгийн хууль” бүтээлүүдээ олон нийтийн хүртээл болголоо. 

Эрүүгийн эрх зүй /Ерөнхий анги/ бүтээлийн товч танилцуулга: 

         Тус сурах бичигт эрүүгийн эрх зүйн ерөнхий ангийн зохицуулалтыг онол болон хэрэглээний хамтаар тайлбарласан байна. Эрүүгийн эрх зүйн ерөнхий ангийн тулгуур ухагдахуунууд ямар онолын үндсэн дээр хэрхэн бий болсон түүнийг хууль хэрэглээний түвшинд хэрхэн задлах бусад ухагдахуунтай хэрхэн уялдаа холбоо бүхий ажиллахыг жишээ тохиолдлын хамт бичсэн бүтээл юм. Тус бүтээлийн анхны хэвлэл нь 2016 онд нийтийн хүртээл болсон бөгөөд уг хэвлэл нь нэмж засварласан гуравдах хэвлэл болно.

Гэмт хэргийн бүрэлдэхүүн бүтээлийн товч танилцуулга:

          Тус бүтээл нь Монгол Улсын эрүүгийн эрх зүйд “Гэмт хэргийн бүрэлдэхүүн” хэмээдэг ухагдахууныг цэвэр хууль зүйн шинжлэх ухааны судлагдахуун талаас авч үзэн, хэм хэмжээний онол дээр тайлбарласан нэг сэдэвт бүтээл юм. Энэ нь Монгол Улсын эрүүгийн эрх зүйд “Гэмт хэргийн бүрэлдэхүүн”-ийг тайлбарлан хэрэглэж байгаа уламжлалт дөрвөн элементийн онолын дараа бий болж байгаа шинэ онолын урсгал гэдгээрээ онцлогтой.

          Тус бүтээлээр Эрүүгийн хуулийн хэм хэмжээний хүрээ, хязгаар, түүний онцлог тал, тодорхой үйлд хамаатуулан зүйлчлэх утгыг илэрхийлсэн ухагдахууныг “Гэмт хэргийн бүрэлдүүн” хэмээн томьёолж түүний харилцан шүтэлцээ бүхий ухагдахууныг цогц байдлаар авч үзсэн байна.

Сургалтын эрүүгийн хууль бүтээлийн товч танилцуулга: 

          Тус бүтээл нь Эрүүгийн хуулийн ерөнхий, тусгай ангид заасан ухагдахууныг товч тайлбарласан эрүүгийн хууль юм. 2017 онд анх хэвлэгдсэн бөгөөд уг хэвлэл нь хамгийн сүүлийн нэмэлт өөрчлөлтийг оруулсан хэвлэл болно.