Монгол Улсын Үндсэн хуулийн эрхийг баригч Б.Чимидийн нэрэмжит “Үндсэн хуулийн болон Захиргааны эрх зүйн суурь асуудал” Олон Улсын эрдэм шинжилгээний IV бага хурал 2023 оны 03 дугаар сарын 22-ны өдөр боллоо.

    Тус бага хурлаар төрийн бүтэц, эрх мэдлийн хуваарилалт, Үндсэн хуулийн хяналт, хүний эрх, захиргааны эрх зүй, захиргааны хэрэг хянан шийдвэрлэх ажиллагаа, нийтийн өмчийн менежмент тэдгээрийн татвар ногдуулалт, уул уурхай ба газар ашиглалт, төрийн өмчит аж ахуйн нэгж, тэдгээрийн арилжааны асуудал мөн төрийн хариуцлага, сахилга бат зэрэг Үндсэн хуулийн болон захиргааны эрх зүйн өргөн хүрээний сэдвийн хүрээнд хуралдаж, хэлэлцэв.

   “Үндсэн хуулийн болон Захиргааны эрх зүйн суурь асуудал” Олон Улсын эрдэм шинжилгээний хурлыг МУИС-ийн Хууль зүйн сургууль, Монголын Хуульчдын холбоо, Япон Улсын Нагояагийн их сургуулийн Хууль зүйн сургууль, Монгол Улсын Үндсэн Хуулийн Цэц, Монгол Улсын Дээд шүүхийн дэргэдэх Шүүхийн сургалт, судалгаа, мэдээллийн хүрээлэн, Хууль зүй, дотоод хэргийн яамны харьяа Хууль зүйн үндэсний хүрээлэн, МУИС-ийн Үндсэн хуулийн хүрээлэн, Нагояагийн их сургуулийн Азийн сателит кампус институт, Ханнс Зайделийн сан, Азийн сан, Чимид сан, Эрх зүйн судалгааны цахим өгөгдлийн сан Легалдата хамтран зохион байгууллаа.

    Хурлыг нэгдсэн болон салбар хуралдааны хүрээнд зохион байгуулсан бөгөөд Монгол, Япон, ХБНГУ, Канад, БНСУ, ОХУ, Унгар улсын нийт 23 илтгэгч англи, монгол хэл дээр илтгэл танилцуулж, хэлэлцүүлэг өрнүүлсэн юм. Мөн хурлын үйл ажиллагааг Легалдата болон Монголын Хуульчдын холбооны цахим хуудсаар шууд дамжуулан олон нийтэд хүргэлээ.