Монголын Хуульчдын холбооноос Хууль зүйн туслалцааны төв, Хууль зүйн үндэсний хүрээлэн, Монголын Нотариатын танхим, Улсын бүртгэлийн ерөнхий газартай хамтран 2023 оны 05 дугаар сарын 23-ны өдөр “Хуульчдын өдөр 2023” өдөрлөг зохион байгууллаа.
Тус өдөрлөгт 200 орчим хуульчид, иргэд оролцсон бөгөөд өдөрлөгийн үеэр Хуульчдын холбоо, түүний хороодын үйл ажиллагааг сурталчлах, хуульчдын нэгдсэн бүртгэл, сургалт, татварын талаарх мэдээлэл, лавлагаа өгөх, цахим гарын үсэг олгох, хууль зүйн зөвлөгөө мэдээлэл өгөх, нотариатын үйлчилгээ үзүүлэх арга хэмжээг үнэ төлбөргүй зохион байгуулснаас гадна Монос групптэй хамтран 6 төрлийн эрүүл мэндийг үзлэг, оношлогоог Хуульчдын танхим болон Хуульчдын талбайд зохион байгууллаа.
Өдөрлөгийн үеэр Хуульчдын холбооны Үндсэн хуулийн эрх зүйн хорооны гишүүн хуульчдын бүтээл "Иргэдээс Үндсэн хуулийн цэцэд ирүүлсэн өргөдөл мэдээллийн төлөв байдал ба Үндсэн хуулийн эрх зүйн хэрэглээ, шинжилгээний гарын авлага" шинэ номын нээлт боллоо.
“Хуульчдын өдөр”-ийг тохиолдуулан хууль зүйн салбарт олон жил үр бүтээлтэй ажилласан хуульчдыг шагнаж урамшууллаа. Тодруулбал, Хууль зүй, дотоод хэргийн сайдын тушаалаар Хуульчдын холбооны гишүүн, хуульч Нямдэлэгийн Ням-Очир, Тамгын газрын ахлах мэргэжилтэн, хуульч Жаргалсайханы Бариаширсүрэн нарыг “Хууль зүйн албаны тэргүүний ажилтан” хүндэт тэмдгээр, Тамгын газрын мэргэжилтэн, хуульч Галсанжамцын Сарангэрэлийг Хууль зүй, дотоод хэргийн яамны “Хүндэт жуух бичиг”-ээр шагнасан бол Хуульчдын холбооны ерөнхийлөгчийн тушаалаар Хуульчдын холбооны гишүүн, хуульч Цагааны Батцэнгэл, Содномдоржийн Бямбарагчаа, Банзрагчийн Цэцгээ, Нямцэрэнгийн Энхтуяа, Мөнхбатын Мөнхжаргал, Гансүхийн Оюунболд, Санхүүгийн зохицуулах хорооны Санхүүгийн боловсрол, сургалтын албаны дарга Намжилын Батжаргал нарын “Хүндэт тэмдэг”-ээр шагналаа.
