Европын холбоо болон Европын сэргээн босголт хөгжлийн банкны санхүүжилтээр Олон улсын эрх зүйн хөгжлийн Байгууллага (IDLO)-аас хэрэгжүүлж буй “Монгол Улсад Арилжааны эвлэрүүлэн зуучлалыг бэхжүүлэх нь төсөл”-ийн нээлтийн үйл ажиллагаа боллоо.

Төслийн гол зорилго нь Монгол Улс дахь эвлэрүүлэн зуучлах ажиллагааны эрх зүйн орчныг боловсронгуй болгох, институцийн бүтэц, практик хэрэглээг сайжруулах, тэр дундаа арилжааны эвлэрүүлэн зуучлалын үйл ажиллагааг улсын хэмжээнд сурталчлан таниулах, эвлэрүүлэн зуучлах ажиллагааг цахимаар явуулах орчныг бүрдүүлэх зэрэгт дэмжлэг үзүүлэхэд оршино.

Нээлтийн үйл ажиллагаанд Монголын Хуульчдын холбоо, Олон улсын эрх зүйн хөгжлийн байгууллага (IDLO)-тaй төслийн гол зорилгыг хэрэгжүүлэх, харилцан санал солилцох, зөвшилцөх, эвлэрүүлэн зуучлагчдыг чадавхжуулах, сургалт, судалгаа, эрдэм шинжилгээний чиглэлээр хамтран ажиллахаар санамж бичигт гарын үсэг зурж, “Төрийн болон төрийн бус байгууллагын дэргэдэх эвлэрүүлэн зуучлах ажиллагаанд анхаарах асуудал” сэдэвт илтгэлийг ЭЗДАЭХ-ны Удирдах зөвлөлийн гишүүн, хуульч Ц.Амарсанаа тавилаа.

Тус үйл ажиллагаанд МХХ-ны Ерөнхийлөгч П.Одгэрэл, Тамгын газрын дарга Ш.Жолбарс, ЭЗДАЭХ-ны тэргүүн Д.Түмэнжаргал, Удирдах зөвлөлийн гишүүд Ц.Амарсанаа, Г.Халиун, Ж.Сайнхишиг, Э.Одонтуяа, Д.Уянга, Б.Отгонтөгс нар болон холбогдох албан тушаалтнууд оролцлоо.