Монголын Хуульчдын холбоо нь АНУ-ын Төрийн департаментын санхүүжилтээр Фулбрайтын мэргэжилтний хөтөлбөрт хамрагдан “Хуульчийн мэргэжлийн шалгалтын арга зүйг шинэчлэн, боловсруулах нь” төслийг хэрэгжүүлж байгаа билээ.

   Энэхүү төслийн Монголын Хуульчдын холбоонд зөвлөж ажиллах мэргэжилтнээр Калифорнийн их сургуулийн профессор, хатагтай Мэй Лин Спенсер шалгарсан. Тэрбээр өнөөдөр Монголын Хуульчдын холбооны төлөөлөлтэй уулзаж, манай улсын хуульчийн мэргэжлийн шалгалтын зохион байгуулалтын талаар мэдээлэл авч, цаашид хэрэгжүүлэх ажлын төлөвлөгөөг гаргасан.

  Профессор, хатагтай Мэй Лин Спенсер тус ажлын төлөвлөгөөнийхөө хүрээнд өнөөдөр Улсын Ерөнхий Прокурорын газрын Сургалт судалгааны хүрээлэнгийн захирал С.Бат-Орших болон холбогдох албан тушаалтнуудтай уулзлаа.

  Уулзалтаар хуульчдад шаардлагатай ур чадвар болон хуульчийн мэргэжлийн шалгалттай холбоотой асуудлаар санал солилцсон юм.

   Тус уулзалтад Монголын Хуульчдын холбооны Тамгын газрын дарга Ш.Жолбарс, Хуульчийн мэргэжлийн шалгалтын хорооны гишүүн, Нийслэлийн давж заалдах шатны шүүхийн шүүгч Э.Золзаяа, Улсын Ерөнхий Прокурорын газрын сургалт судалгааны хүрээлэнгийн Сургалтын албаны дарга О.Алтангэрэл, Судалгааны албаны дарга Б.Мөнхдорж, Бодлого төлөвлөлт, хяналт шинжилгээ, үнэлгээний хэлтсийн ахлах прокурор Б.Эрхэмбаяр, Хяналтын прокурор, доктор Б.Өнөрмаа болон холбогдох мэргэжилтнүүд оролцлоо.