Монголын Хуульчдын холбооны Зөвлөлөөс энэ жилийн хуульчийн мэргэжлийн шалгалтыг 2024 оны аравдугаар сарын 16-18-ны өдрүүдэд Улаанбаатар хотод зохион байгуулахаар товлосон.
Шалгалтын товыг шалгалт эхлэхээс 75-аас доошгүй хоногийн өмнө хэвлэл мэдээллийн хэрэгслээр нийтэд зарлахаар хуульд заасны дагуу Монголын Хуульчдын холбооноос өнөөдөр(2024.08.01) хэвлэлийн бага хурал зохион байгуулж мэдээлэл өглөө.
Хэвлэлийн бага хуралд Монголын Хуульчдын холбооны Тамгын газрын дарга Ш.Жолбарс, Хуульчийн мэргэжлийн шалгалтын асуудал эрхэлсэн хорооны гишүүн, НЗАШШ-ийн шүүгч Т.Мөнх-Эрдэнэ, Хуульчийн мэргэжлийн шалгалтын зохион байгуулалтын комиссын гишүүн, МХХ-ны Зөвлөлийн гишүүн, өмгөөлөгч Ш.Алтангадас, Хуульчийн мэргэжлийн шалгалтын зохион байгуулалтын комиссын гишүүн, Нийслэлийн Сүхбаатар дүүргийн ахлах прокурор Ц.Ариунжаргал, Хуульчийн мэргэжлийн шалгалтын зохион байгуулалтын комиссын гишүүн, “Отгонтэнгэр” их сургуулийн багш, хуульч Б.Ургамалцэцэг нар оролцож шалгалтын зохион байгуулалт, журмын талаар мэдээлэл өгсөн юм.
Хуульчийн мэргэжлийн шалгалт нь хуульчийн мэргэжлийн үйл ажиллагаа эрхлэх зөвшөөрөл авахыг хүссэн этгээдийн шүүх эрх мэдлийг хэрэгжүүлэх, шүүн таслах ажиллагаанд оролцох, хууль зүйн туслалцаа үзүүлэх хангалттай мэдлэг, чадвар эзэмшсэн эсэхийг тогтоох зорилготой бөгөөд тус шалгалтад эрх зүйч мэргэжлээр бакалаврын боловсрол эзэмшиж, хоёр жилийн хугацаанд мэргэжлийн дадлага хийсэн хүмүүс оролцох эрхтэй байдаг.
Тус шалгалт нь эрх зүйн ерөнхий мэдлэгийг сорьсон сорилгын болон эрх зүйн салбарын хүрээнд тодорхой тохиолдлыг хууль хэрэглэж шийдвэрлэх бодлогын шалгалтын хэлбэрээр зохион байгуулагддаг билээ.
Шалгалтын бүртгэл https://burtgel.mglbar.mn/ хаягаар явагдах бөгөөд 2024 оны 08 дугаар сарын 02-ны өдрийн 00:00 цагт эхэлж, 09 дүгээр сарын 15-ны өдрийн 00:00 цагт хаагдана.
Монголын Хуульчдын холбооноос шалгалтад оролцогчдод зориулан “Хуульчийн мэргэжлийн шалгалтын сорилго”, “Бодлого бодох аргачлалын гарын авлага” номуудыг эрхлэн гаргадаг бөгөөд ирэх долоо хоногоос хэвлэлтээс гаргахаар төлөвлөөд байна. “Хуульчийн мэргэжлийн шалгалтын сорилго” гарын авлага нь үндсэн гурван хэсгээс бүрдэх бөгөөд эхний хэсэгт 2024 оны дөрөвдүгээр сарын 1-ний өдрийн байдлаар Монгол Улсад хүчин төгөлдөр үйлчилж байгаа хуулиудын хүрээнд хийгдсэн 3459 тестийг оруулсан бол хоёрдугаар хэсэгт тохиолдол дээр тулгуурлан боловсруулсан 1204 шинэ сорилгыг оруулсан бөгөөд эдгээр тестийн зөв хариулт өгөгдөөгүй тул шалгалтад оролцох эрх зүйчид нь өөрсдөө тухайн тохиолдол дээр ажиллаж хариуг олохоор хийгдсэн. Энэ нь шалгалтад оролцох эрх зүйчдийн бүтээлч ажиллагааг нэмэгдүүлэх зорилготой юм.
Монголын Хуульчдын холбоо АНУ-ын Засгийн газрын санхүүжилттэй “Фулбрайтын мэргэжилтний хөтөлбөр”-ийн тэтгэлгээр шалгалтын тестийг шинэчлэх төсөл хэрэгжүүлж, энэхүү төслийн хүрээнд Калифорнийн их сургуулийн профессор Мэй Лин Спенсер нэг сарын хугацаанд Монголын хуульчдын холбоон дээр ажиллан тест боловсруулах онол, арга зүйн сургалт явуулж, суралцагчдаар тест зохиолгон дадлагажуулах, засаж зөвлөх зэргээр үр дүнтэй хамтран ажиллахын зэрэгцээ хуульчийн шалгалтын тестийг шинэчлэх онол, арга зүйг эзэмшсэн сургагч багш нарыг бэлтгэсэн бөгөөд сорилгын гурвдугаар хэсэгт профессор Мэй Лин Спенсертэй хамтран ажилласан ажиллагааны хүрээнд шинээр боловсруулсан 10 тестийг хариултын хамт оруулсан болно.
Шалгалттай холбоотой дэлгэрэнгүй мэдээллийг 70116364 дугаарын утсаар холбогдож авах боломжтой юм.
МОНГОЛЫН ХУУЛЬЧДЫН ХОЛБОО
ШАЛГАЛТЫН ЗОХИОН БАЙГУУЛАЛТЫН КОМИСС
