Монголын Хуульчдын холбооны Тамгын газрын дарга Ш.Жолбарс Германы Касселын их сургуулийн Нийгмийн хамгаалал, эрүүл мэндийн эрх зүйн тэнхимийн профессор, Германы холбооны нийгмийн хамгааллын шүүхийн хүндэт шүүгч Феликс Вельти, Касселын их сургуулийн докторант, судлаач С.Амармэнд нарыг өнөөдөр хүлээн авч уулзлаа.

Уулзалтаар Монгол, Германы нийгмийн хамгааллын салбарын талаар туршлага хуваалцсаны зэрэгцээ Касселын их сургууль, Монголын Хуульчдын холбооны цаашдын хамтын ажиллагааны талаар санал солилцож, хамтран ажиллахаар боллоо.

Профессор Феликс Вельти Монголын Хуульчдын холбооны урилгаар манай улсад ажиллаж байгаа бөгөөд тэрбээр нийтийн эрх зүй, түүний дотор Европын эрх зүй, нийгмийн хамгаалал, эрүүл мэндийн эрх зүйн зэрэг чиглэлээр "Нийгмийн баримжаат эрх зүйт төр дэх хүний хөгжлийн бэрхшээл ба нөхөн сэргээлтийн асуудал", "Европын үндсэн хуулийн тухай гэрээ ба орон нутаг дахь нийгмийн суурь үйлчилгээ" зэрэг сэдвээр шинжлэх ухааны докторын зэрэг хамгаалсан байна.

Тэрбээр маргааш Монголын Хуульчдын холбооны Захиргааны эрх зүйн хорооноос зохион байгуулах “Монгол Улсын нийгмийн хамгааллын эрх зүйг боловсронгуй болгох нь: ХБНГУ-ын нийгмийн хамгааллын эрх зүй ба сайн туршлага” сэдэвт хэлэлцүүлэгт оролцож, “Германы нийгмийн хамгааллын эрх зүйн тусгай зохицуулалтууд ба нийгмийн хамгааллын шүүхийн үүрэг” сэдвээр илтгэл хэлэлцүүлэх юм.

Тус уулзалтад Монголын Хуульчдын холбооны Гадаад харилцааны зөвлөх Ц.Одонжав, Захиргааны эрх зүйн хорооны Удирдах зөвлөлийн гишүүн Д.Номин нар оролцсон.