Захиргааны эрх зүйн хорооноос "Миний дуртай захиргааны эрх зүй“ цуврал уулзалтыг “БНСУ, БНХАУ-ын шүүхийн цахимжилтын ололт (бодит ажиглалт)” сэдвээр 2025 оны 06 дугаар сарын 05-ны өдөр зохион байгууллаа.
Тус уулзалтын панелистаар Захиргааны эрх зүйн хорооны тэргүүн, Нийслэл дэх Захиргааны хэргийн анхан шатны шүүхийн шүүгч Т.Мөнх-Эрдэнэ оролцож, БНСУ болон БНХАУ-д шүүхийн цахимжилтын талаар судлаж ажилласан бодит ажиглалтын үр дүнгээ хуульч нарт хуваалцсан юм.
Тухайлбал, БНСУ, БНХАУ-ын шүүхийн цахимжилтын хөгжлийн үе шат, цөм системүүдийг хөгжүүлсэн байдал, цахимаар нэхэмжлэл гаргах, цахим нотлох баримтыг хүлээн авч бэхжүүлж, үнэлэх ажиллагаа, цахимаар хэрэг хянан шийдвэрлэх буюу цахим шүүх хуралдаан явуулах, тухайлан байгуулсан цахим шүүхийн тогтолцоо, шүүхийн барилга байгууламж, техник төхөөрөмжийн стандарт, хөгжил, шүүхийн цахимжилтад хөрөнгө оруулалт, дэд бүтцийн хөгжүүлэлт суурь асуудал болох тухай зэрэг олон сонирхолтой мэдээллийг танилцууллаа.
Уулзалтын төгсгөлд БНСУ, БНХАУ-ын шүүхийн цахимжилтын туршлагын талаар захиргааны эрх зүйн чиглэлээр ажиллаж буй хуульч, судлаач, эрх зүйч нар өөрийн сонирхсон асуултыг асууж, хариулт авахын зэрэгцээ панелистын зүгээс манай улсад хэрэгжиж байгаа “Цахим шүүх 2.0” цөм системийн хөгжүүлэлтийн талаарх зарим нэг мэдээллийг оролцогч нарт хүргэлээ.
