Монголын Хуульчдын холбоо нь АНУ-ын Элчин Сайдын яамтай хамтран “Фулбрайт”-ын хөтөлбөрийг 8 дугаар сард хэрэгжүүлэхээр ажиллаж байна. Энэ хүрээнд “Кибер аюулгүй байдал”-ын чиглэлээр АНУ-аас мэргэжилтэн, доктор Divine Sufor Anye хүрэлцэн ирэх бөгөөд тэрбээр 2 долоо хоногийн хугацаанд “Кибер аюулгүй байдал”-ын практик сургалтыг, лабораторийн орчинд явуулах юм. 

Эхний 7 хоногийн сургалт 2025 он наймдугаар сарын 4-8-ны өдрүүдэд Шүүхийн Ерөнхий зөвлөлийн байранд болох бөгөөд энэ сургалтад Нийслэл, орон нутгийн анхан, давж заалдах шат болон Дээд шүүх, Шүүхийн сахилгын хорооны мэдээллийн технологийн мэргэжилтнүүдийн төлөөлөл оролцоно.

Дараагийн сургалт 2025 оны наймдугаар сарын 11-15-ны өдрүүдэд Мэдээллийн технологийн үндэсний паркийн байранд болно. Тус сургалтад Кибер халдлага, зөрчилтэй тэмцэх Үндэсний төв, Кибер халдлага, зөрчилтэй тэмцэх Нийтийн төв, Кибер аюулгүй байдлын Цэргийн командлал, ЦЕГ-ын Кибер гэмт хэрэгтэй тэмцэх газар, Цахим аюулгүй байдлын мэдээлэл удирдлагын төв зэрэг байгууллагын мэргэжилтнүүд оролцох юм. Түүнчлэн Кибер аюулгүй байдлын зөвлөлийн Ажлын алба энэхүү сургалтад дэмжлэг үзүүлэн оролцож байна.