Монголын Хуульчдын холбоо нь Монголын Нотариатчдын танхимтай хамтран ажиллах гэрээ байгууллаа. Хамтран ажиллах гэрээг Монголын Хуульчдын холбооны Ерөнхийлөгч П.Одгэрэл, Монголын Нотариатчдын танхимын Ерөнхийглөгч Ч.Баянжаргал нар 2025 оны есдүгээр сарын 16-нд үзэглэж, цаашид хамтран хэрэгжүүлэх ажлын талаар солилцлоо.
Монголын Хуульчдын холбоо болон Монголын Нотариатчдын танхим нь Хуульчдын ордонд үйл ажиллагаа явуулах болсонтой холбогдуулан талууд бие биеийнхээ үйл ажиллагааг дэмжих, хамтын ажиллагааг хөгжүүлэх зорилгоор өргөн хүрээнд хамтран ажиллахаар энэхүү гэрээг байгуулсан юм.
Монголын Хуульчдын холбоо нь чиг үүргээ хороодоор дамжуулан хэрэгжүүлдэг. Энэ хүрээнд Нотариатчдын танхимын гишүүд нь Нотариатын хөгжлийг дэмжих хороог байгуулж, Хуульчдын холбооны үйл ажиллагаанд идэвхтэй оролцож ирсэн билээ.
